Um hátíðarnar náði ég að taka myndir af þremur trillum sem ég mun leita upplýsinga um.  Einn hefur þegar skilað sér, Lára SH 73.  Þessir tveir hér fyrir neðan verða fiskaðir upp, hef þegar náð sambandi við eigendur en á eftir að tala við þá aftur.  Til gamans má geta þess að ég smellti myndum af bátum í höfninni í Stykkishólmi og setti inn í albúm, skip og bátar 2.  Eins og fyrr þá eru allar upplýsingar vel þegnar ef þið hafið einhverja vitneskju um bátana.

Knörr SH 106.  Stykkishólmur 27.12.2010


5008 Hrímnir SH 714. Stykkishólmur 25.12.2010

Var frekar óduglegur með myndavélina um jól og áramót.  Hef oft verið duglegri en núna klikkaði ég.  En ég tók einhverjar myndir af jólunum hjá tengdaforeldrunum og síðan tók ég myndir af Elínu Hönnu með neyðarblys á gamlárskvöld hér í Hafnarfirði.  Nokkrar myndir í myndaalbúmi.

Elín Hanna farin að bíða eftir pökkunum.  Stykkishólmur 24.12.2010


Skreyting eftir tengdapabba.  Stykkishólmur 24.12.2010


Elín Hanna með neyðarblys.  Hafnarfjörður 31.12.2010

Kæru vinir, kunningjar og velunnarar síðunnar.  Nú dregur að áramótum og ég ætla að verða í fyrrafallinu með áramótakveðjuna núna.  Gef mér líklega ekki tíma til þess að fara hér inn fyrr en á nýju ári.  Ég óska ykkur öllum gleðilegs nýs árs og vona að þið hafið það gott á nýju ári.

Lyfti myndavélinni um jólin og náði m.a. myndum af Láru SH 73.  Ég ræddi við eiganda Láru, Ásgeir Árnason og sendi hann mér eftirfarandi upplýsingar:

Við pabbi, Árni Sigurjónsson, hófum smíði Lárunnar í júlí 1977 og sjósettum hana  í júní 1978. Báturinn var smíðaður í frístundum á kvöldin og um helgar í bílskúrnum á Skúlagötu 1 Stykkishólmi.  Vélin var 18 hö Sabb til að byrja með og síðan skiptum við um vél 1983 í BMW 30 hö.  Engar breytingar hafa verið gerðar á bátnum. Engar lagfæringar nema eðlilegt viðhald.

5957 Lára SH 73, Stykkishólmur 27.12. 2010

Jólin 2010

Hver man ekki eftir að hafa séð jólakort þar sem stór jólastjarna skein á himni og vísaði vitringunum veginn til frelsarans. Þessi mynd mynnir mig svolítið á þessi gömlu jólakort með stjörnunni góðu.  Kyrrðin, stjörnubjartur himinn, gömul hús (þó ekki fjárhús) og þetta skæra ljós á himni. Vona að þið finnið þessi áhrif líka þegar þið skoðið þessa mynd.

Kæru ættingjar, vinir og velunnarar síðunnar.  Megi Guð gefa ykkur og fjölskyldum ykkar gleðileg jól.  

Með jólakveðju Rikki R



Ég má til að setja hér önnur hughrif, setjið ykkur nú í stellingar og skrúfið ímyndunaraflið á fullt.
Jólastjarnan skín skært á heiðskírum næturhimninum.  Vitringarnir þrír (Bræðraminni, Bogabúð og Berg)  fylgja stjörnunni eftir og nálgast íverustað frelsarans (Vegamót).  Þar innandyra er María mey (Álfheiður Ingadóttir þingmaður).................

Nei, nú fór ég alveg með þetta.  Fyrirgefið þetta innskot en ég mátti til.

Er byrjaður að færa inn endurvinnslusöguna af Kára eins og ég upplifi hana.  Sagan er myndskreytt og vona ég að þið hafið gaman af, það hef ég alla vegna.  Þarna er áttunda umfarið komið á sinn stað og afturhlutinn farinn að taka á sig bátsmynd.

Afturstefnið eða hvað menn vilja kalla það, 10.12.2010

Þá er einnig kominn inn sagan af Sílinu í Hafnarfirði.  Þar segir Björn smiður og eigandi frá bátnum og af hverju hann smíðaði hann.

Sílið, 20. nóvember 2010

Var að bæta inn myndum í þrjú myndaalbúm, Kári og Flóabáturinn Konráð BA152.  Að endingu er það Sílið í Hafnarfirði.  

Af Sílinu er helst að frétta að hann er kominn hús og eitthvað verið að betrumbæta hann.  Björn smiður kvaðst hafa gert smá mistök í smíðinni, böndin í bátnum væru of veigalítil og ætlaði hann að skipta þeim út og þá ætlaði hann að hækka borðstokkinn.  Björn vildi meina að það yrði nokkur útlistbreyting á bátnum.  Ætla að fylgjast með þessu eftir bestu getu og svo þegar báturinn fer á sjóinn í vor/sumar þá festi ég hann á kubbinn aftur.  Fæ frásögn eiganda bátsins vonandi fljótlega, enda væri gaman að geta fylgst með bátnum næstu árin/áratugina og uppfæra alltaf söguna. 

Sílið í Hafnarfjarðarhöfn.

Það er helst að frétta af endusmíði Kára að Ólafur er kominn í áttundu umferð.  Á myndin hér að neðan er það sjöundu umferð sem er komin.  Þegar ég spurði Ólaf hvort hann þyrfti að skipta um öll borðin kvaðst hann ekki viss.  Það eru 11 umferðir, þið fyrirgefið en ég þekki kanski ekki réttu orðin í þessu.  Ég sá að talsvert er skemmt í þeirri 10 og gæti verið að það slippi að skipta um hluta en þar sem ég er ekki kunnáttumaður í viðgerðum á bátum þá verður þetta að koma í ljós síðar.  Ef vel er skoðað má sjá að nákvæmnin er í fyrirrúmi, ekki að sjá að skekkja sé í bátnum.

Stefnið á Kára, 20. nóvember 2010

Nýjar, gamlar myndir komnar af Konráð BA 152 sem ég fékk sendar frá Torfa Haraldssyni sem hann tók sjálfur.  Aðra myndina var ég búinn að fá en þar hafði verið klippt af henni svo Konráð sást ekki allur.  Hin myndin sem hér má sjá er tekin á sama tíma nema það er fjara.  Á myndinni sést Konráð inni í Grýluvogi þar sem hann var rifinn niður.  Ekki mikið eftir af síðunum á honum þarna en stýrishúsið enn á sínum stað.

Konráð BA 152.  Ljósmynd: Torfi Haraldsson

Litir fiðrilda eru margvíslegir.  Mér fannst því við hæfi að setja inn nokkrar myndir sem ég hef tekið af litríkum fiðrildum hér heima og erlendis, því nú er sá tíma þegar menn hengja upp litrík ljós og lýsa upp skamdegið.  Ég geri það líka en hef líka gaman að skoða þessi litríku dýr.  Einstaka sinnum berast hingað til lands litrík fiðrildi eins og þistilfiðrildi og aðmírálsfiðrildi. Ég var eitthvað að skoða myndirnar mínar og sá að ég átti eitthvað af myndum af fiðrildum. Ég safnaði því þessum myndum saman í eitt myndaalbúm hér á síðunni.  Set inn tvö fiðrildanna minna hér, en fleiri eru í myndaalbúmi, mun svo setja inn nöfn þeirra og jafnvel einhverjar upplýsingar um þau.  Vonandi hafiði gaman af að skoða.

Papilio Machaon Syriacus.  Arnarhreiðrið, Þýskalandi, 25. júní 2008


Monarch butterfly, Danaus Plexippus.   Florida 15. mars 2010

Kíkti í Hafnarfjarðarkirkjugarð.  Smellti nokkrum myndum af því sem ég sá þar og setti inn í albúm.  Enn hangir eitt og eitt laufblað.  Talsvert er af reyniberjum ennþá en samt greinilegt að fuglarnir vilja ekki öll ber eða þá að þeir séu eins og mannfólkið að því leiti að þeir borða þau ber sem er auðveldast að taka, skilja hin eftir.

Eitt laufblað.  Hafnarfjörður 14. nóvember 2010


Matvandir fuglar.  Hafnarfjörður 14. nóvember 2010

Skrapp og leit eftir fuglum í dag 14. nóvember 2010.  Eins undarlegt og það hljómar þá kíkti ég í þrjá krikjugarða og það var mikið líf í þeim öllum.  Já, ég stend við það.  Í Garðakirkjugarði sá ég músarindil, nokkra skógarþrestir, þrjá svartþresti og fjóra hrafna.  Í Hafnarfjarðarkirkjugarði var mikið af skógarþröstum, nokkrir auðnutittlingar og nokkrir svartþrestir (10).  Í Fossvogskirkjugarði var allt iðandi af lífi, skógarþrestir í tugatali, svartþrestir (15+), auðnutittlingar og einn músarindill.  Sem sagt mikið líf í kirkjugörðum á höfuðborgarsvæðinu.  Tók eitthvað af myndum sem sjá má í albúmum með nöfnum þessara þriggja hér fyrir neðan.

Auðnutittlingur kroppar í reyniber.  Fossvogskirkjugarður 14. nóvember 2010


Skógarþröstur kroppar í reyniber.  Fossvogskirkjugarður 14. nóvember 2010


Svartþröstur rennir reyniberi niður.  Fossvogskirkjugarður 14. nóvember 2010

Þegar ég kíkti í Hafnarfjarðarhöfn seinnipartinn þá voru tveir bátar við löndunarkranann.  Kristján ÍS 110 var að landa og Dúddi Gísla GK 48 var að koma inn til löndunar og þurfti að bíða aðeins.  Aflinn hjá báðum bátum var aðallega ýsa, en þeir á Kristjáni vildu meina að þetta væru um 3,5 tonn hjá þeim en karlarnir á Dúdda Gísla vildu meina að þetta væri um 3 tonn gæti farið aðeins uppfyrir það.  Smellið á myndirnar þá opnast myndaalbúmið með slatta af myndum frá löndununum.

2783 Kristján ÍS 110 við löndun.  Hafnarfjarðarhöfn 14. nóvember 2010


Aflinn úr Kristjáni var um 3,5 tonn, allt Ýsa.  Hafnarfjarðarhöfn 14. nóvember 2010


Landað úr Dúdda Gísla.  Hafnarfjörður 14. nóvember 2010


Aflinn var um 3 tonn hjá Dúdda Gísla, aðallega Ýsa.  Hafnarfjörður 14. nóvember 2010


Ýsunni hellt milli kara.

Nýsmíðin sem ég sá í Hafnarfjarðarhöfn 14. nóvember 2010 s.l. ber nafnið Sílið.  Sá sem smíðaði bátinn er Björn Björgvinsson.  Björn fær orðið:

Tilurð Sílisins er sú að ég tók þátt að hluta í Reykhólaverkefninu hér fyrir nokkrum árum en gat ekki sinnt því nógu vel . En það varð til þess að ég fór að hugsa um að það gæti verið gaman að klambra saman svona litlum bát við tækifæri. Með minkandi vinnu á þessu ári þá gafst þetta tækifæri núna í vor.

Helstu mál Sílisins eru 5m. að lengd miðað við ytri brún á saumfari, breidd er 1,74m. miðað við ytri brún á byrðing og dýpt er 0,74m. frá efri brún á skjólborði og ofan á kjöl.  Umför eru 8 og efni er fura nema í böndum en í þeim er eik.  Það er vél í bátnum en það er utanborðsmótor sem er settur í stokk að færeyskri aðferð.  Mótorinn er af HIDEA gerð 15Hp. fjórgengis.

Kjölurinn var lagður í apríl og sjósetning núna í byrjun október.


08.12.2010 Ræddi við Björn bátasmið sem sagði Sílið komið í hús núna og hann kvaðst ætla að lagfæra hann aðeins.  Í ljós hafi komið að böndin í bátnum væru of veigalítil og kvaðst Björn ætla að skipta þeim út.  Þá kvaðst hann ætla að hækka borðstokkinn og við það myndi Sílið taka smáveigilegum breytingum.  Aðspurður um söluna á bátnum kvaðst Björn eiginlega verið fallin frá því að selja bátinn.  Fengi ekki það mikið fyrir hann núna á þessum tíma. 

Meðan ég skrifa þetta finnst mér það svolítið gaman að segja að saga þessa báts er farin af stað.  Eftir að hafa verið settur á flot þá koma fram atriði sem smiðurinn vill laga.  Fyrsta breytingin á bátnum er hafin.  Varla hægt að tala um breytingu þar sem síðasti naglinn var nánast settur í gær.  Auðvita þarf að prufa og sjá hvort eitthvað mætti betur fara og er þetta liður í því.  Hins vegar þá er búið að festa bátinn á mynd og þegar næst verður tekin mynd af honum þá verður hann eitthvað öðruvísi útlits.

Það verður gaman að fylgjast með þessum bát næstu árin/áratugina og uppfæra alltaf söguna. 

Sílið í Hafnarfjarðarhöfn 14. nóvember 2010


Handbragðið er í lagi.

24. janúar 2011 var Sílið sett á flot aftur eftir breytingar.  Samkvæmt því sem Björn sagði þá eru helstu breytingar þær að skjólborð var hækkað og bönd voru styrkt.  Aðrar breytingar eru þær sem ég sá að búið er að smíða kassa utan um utanborðsmótorinn, breyta stýrinu, sem Björn gerði svo aftur þann 25. janúar 2011, setja mastur og seglbúnað, setja spjót framan á bátinn.  Útlit bátsins hefur því breysti talsvert.  Björn fór smá túr í dag, 25. janúar 2011, með aðstoðarmann frá Siglingaklúbbnum.  Ætlunin var að prófa seglbúnaðinn, gaffalseglið.  Ekki gekk það upp sem skildi því það var blankalogn.  Búnaðurinn var þó settur upp og kvaðst Björn hafa séð smávegis sem þyrfti að laga varðandi böndin á seglbúnaðinum en svo væri bara að prófa bátinn þegar vindur er.

Sílið, Hafnarfjörður 25. janúar 2011

Björn hafði samband við mig í gær, 02.02.2011 og tilkynnti mér að nýr eigandi væri af Sílinu.  Nýr eigandi heitir Ingvar Jakobsson.  Báturinn heldur nafni og verður staðsettur á Miðfirði og heimahöfn Hvammstangi.

Vantar hjálp!  Ég er að safna myndum af flóabátnum Konráð BA 152.  Eina myndin sem ég á af Konráði er stýrishúsið af honum sem er í Flatey.  Hugmyndin hjá mér núna er að setja eitthvað um bátinn hér inn á síðuna.  Tengdapabbi var vélstjóri á Konráð.  Mér væri mikil hjálp í því ef þið eigið myndir af Konráð eða vitið um einhverja sem eiga myndir af honum og ég ætti möguleika á að fá.  Allar myndir vel þegnar, jafnvel myndir af fólki um borð í Konráð.  Mikill vill meira, segir einhversstaðar. 
Efri myndina, hér að neðan, af Konráð með gamla stýrishúsinu, fann ég í safni tengdaforeldra minna.  Neðri myndina fékk ég hjá Rafni Ólafssyni.  Þakka ég þeim kærlega fyrir lánið á myndunum.

Flóabáturinn Konráð BA 152.  Ljósmynd úr safni tengdaforeldra minna.


Flóabáturinn Konráð BA 152 með nýrra húsinu.  Ljósmynd: Rafn Ólafsson

Ég held ég halli ekki á neinn með fyrirsögninni á þessari færslu, "Spekingar spjalla".  Ég kíkti á endursmíði Kára í dag til að sjá hvernig gengi.  Hitti á þrjá mjög fróða menn um báta.  Þetta voru Ólafur A. Gíslason, Valdimar Jónsson og Hafliði Aðalsteinsson.  Held ég hafi stoppað þarna í um 2 1/2 klst. og það "vall upp úr þeim fróðleikurinn".  Ég hafði mjög gaman af því að ræða við þá og heyra hvað væri framundan í bátageiranum.  Ég þakka þessum heiðursmönnum kærlega fyrir mig.  Ólafur er nú ekki alveg laus við mig því ég mun halda áfram að fylgjast með þessari endursmíði.  Fleiri myndir af stöðu mála í myndaalbúminu Kári.

Ólafur A. Gíslason, Valdimar Jónsson og Hafliði Aðalsteinsson.


Borðin eru vandlega felld á sinn stað.


Búið að setja eina borðaröð allan hringinn.  Ólafur skrúfar og neglir allt fast.

Ég skrapp í fuglaskoðun í dag og ætlaði mér að ná nokkrum myndum.  Ég náði myndum en þær verða ekki til sýnis vegna lélegra gæða.  Ég fór í Þorbjörn við Grindavík.  Þar var mikið fuglalíf.  Rétt eftir að ég mætti á staðinn kom þangað undur strákur, Anton Ísak Óskarsson 14 ára.  Hann hefur mikinn áhuga á fuglaljósmyndum og ég verð að segja eftir að hafa skoðað Flickr síðuna hans að hann er talsvert góður.  Við sáum eina bókfinku, alla vegna fjóra gransöngvara og þá var mikill fjöldi glókolla á sveimi.  Af íslenskum fuglum má nefna, auðnutittlinga, skógarþresti, músarrindla og ekki má gleyma svarþrastarkerlingu.  Ég leyfði mér að taka eina mynd af Flickr síðu Antons, af bókfinkunni sem við sáum.  Ef þið smellið á myndina þá fariði beint inná Flickr síðuna hans.  Þá hef ég sett slóð inná síðuna hans á forsíðunni minni, til hægri.  Vona að mér fyrirgefist að stela þessari mynd frá honum en hún er merkt honum, nafn hans sett neðan við myndina, linkað á síðuna hans o.fl.  Ég er ekki vanur að setja inn myndir eftir aðra nema í undantekningartilfellum og þá yfirleitt með leyfi, en ekki núna.  Ég tók þessa í leyfisleysi og viðurkenni það hér.  En endilega kíkið á síðuna hans Antons og kíkið á fuglana hans.

Bókfinka.  Myndina tók Anton ísak Óskarsson 31. október 2010 í Þorbirni við Grindavík.