Jæja gott fólk þá erum við fjölskyldan komin frá Austurríki.  Ferðin var frábær og veðrið lék við okkur.  Það má líka segja að Björg Ólöf, Armin, Jóhann Örn, Andri Hjörfar og Kristjón Benedikt hafi leikið við okkur því að koma til þeirra var frábært og þau fóru með okkur í nokkrar ferðir og sýndu okkur landið.  Þeirra hluti í að gera þessa ferð ógleymanlega fyrir okkur verður sein hægt að fullþakka en þau eru höfðingjar heima að sækja og heimili þeirra er yndislegt.  Björg Ólöf og Armin við þökkum ykkur fyrir okkur og þið getið bókað að við komum aftur og það verður ekkert mjög langt þangað til.
Ljósmyndir úr þessari ferð urðu 982 en hér á síðunni er bara sýnishorn.  Myndirnar eru í möppu sem heitir Austurríki 2008.  Vona að þið upplifið hluta af þessu frábæra landslagi og landi sem við heimsóttum.  Síðar mun ég setja inn einhvern texta við myndirnar til að þið vitið hvar þær eru teknar.  Að lokum þá mæli ég með að þið farið öll til Austurríkis og skoðið þetta frábærlega fallega land.  Svo ég vitni í Elfu Dögg þá sagði hún að "Það væri allt fallegt í Austurríki nema kindurnar".  Á einhversstaðar mynd af kind en hún var ekki góð svo hún fór ekki þarna inn en fyrir ykkur sem viljið vita þá eru þessar kindur með löng lafandi eyru.  Hér er ein mynd sem sýnir smá af þessu frábæra landi.  Nú fer ég til Húsavíkur í tvo mánuði og mun reyna að halda áfram að setja inn myndir þaðan.

Loksins kemur meira frá 100 ára afmæli Hafnarfjarðar.  Margt var að gerast og tók ég myndir bæði 31. maí  og 01. júní sem jafnframt var sjómannadagurinn.  Margt var til skemmtunar.  Þar sem myndir frá fyrri deginum eru þegar hér inni geri ég nú seinni deginum aðeins skil.  Ég og Elín Hanna fórum á sjóinn með bátnum Fagrakletti.  Um borð í  bátnum voru sjóræningjar og gátu þeir engan vegin komið sér saman um hver væri skipstjóri á þessu bát.  Þeir drukku ótæpilega af rommi, dönsuðu og sungu.  Þá fylgdumst við með dansi frá krökkum úr DÍH (Dansíþróttafélagi Hafnarfjarðar).  Þá sungu Lúdó og Stefán nokkur lög.  Elín Hanna þurfti svo að mæta í Haukahúsið en þar mættu flestallir kórar Hafnarfjarðar og sungu.   Þetta var glæsileg afmælisveisla hjá Hafnarfjarðarbæ.  Talsvert af nýjum myndum komið inn í albúmið.

Afmælistertan, hér aðeins orðin 75 metra löng en varð 100 metrar. 
Myndin tekin 01. júní 2008.

Rakst á gamla íbúa Húsavíkur og smellti af þeim myndum án þeirra vitundar.  Hér má sjá Daða Halldórs að meta gítarleikinn hjá Veðurguðunum á 100 ára afmæli Hafnarfjarðar. 

Daði Halldórsson.  Myndin er tekin á Víðistaðatúni þann 31. maí 2008.

Ákvað að setja  inn nýtt albúm sem ég kalla ýmis farartæki.  Þar set ég inn myndir af hinum ýmsu farartækjum sem ég tek myndir af en þó helst ekki bátum, þeim eru gerð skil annarsstaðar.  Setti nokkrar myndir þar inn. Hér má sjá eina mynd af lítilli flugvél TF-PZL, ég hef ekkert vit á þessu og veit ekkert hvaða tegun þetta er.  Kanski kemur það með tímanum að ég get frætt ykkur um þetta en tíminn einn leiðir það í ljós.

TF-PZL myndin tekin 09. júní 2008. 

Fékk þessar upplýsingar sendar frá Sigurði Ásgeirssyni, eiganda vélarinnar:
Vélin heitir PZL-101A Gawron og er pólsk smíðuð 1967.  Gömul sjúkraflugvél og notar mjög stuttar og lélegar flugbrautir. 
Kveðja,  Siggi (á gripinn)

Sjómannadagurinn féll inn í 100 ára áfmæli Hafnarfjarðarbæjar.  Þegar við feðginin skruppum á sjóinn þá tók ég nokkrar myndir af bátum sem ég sá m.a. björgunarsveitarbátunum.  Fleiri myndir má sjá í bátaalbúminu.

Myndin er tekin 01. júní 2008, á sjómannadaginn sem jafnframt var á 100 ára afmæli Hafnarfjarðarbæjar.  Hér má sjá Einar Sigurjónsson á fullu stími.

Skrapp í Fossvogskirkjugarð og tók þar nokkrar myndir af blómum.  Þar sem ég var frekar seint  að kvöldi eru myndirnar ekki mjög margar en vonandi njótiði þeirra samt.  Fleiri myndinr inn í blómaalbúminu mínu.

Blóm í Fossvogskirkjugarði, myndin er tekin þann 09. júní 2008.

Nú fer eitthvað að gerast hjá mér.  Hef haft lítinn tíma til að setja inn myndir en það stendur til bóta.  Það sem er væntanlegt er m.a. seinni hluti 100 ára afmælis Hafnarfjarðarbæjar sem tengdist sjómannadeginum, þá eru myndir sem eiga eftir að bætast inní Húsvíkingar fyrr og nú albúmið, eitthvað inní blómaalbúmið, einhverjir bátar og fleira og fleira.  Hér eru myndir frá 100 ára afmæli Hafnarfjarðar.  Þessi strákur lék sér á Víðistaðatúni á meðan tónleikarnir stóðu yfir.

Myndirnar teknar á 100 ára afmæli Hafnarfjarðarbæjar á Víðistaðatúni, 31. maí 2008.

Nú er hátíð í bæ.  Hafnarfjarðarbær er 100 ára og mikið um að vera í bænum.  Ég og Elín Hanna skruppum í bæinn í gær 31. maí og tókum nokkrar myndir.  Myndirnar sem Elín Hanna tók eru svona inn á milli.  Margt var til skemmtunar.  Enduðum á tónleikum en þegar við höfðum hlustað á þrjár hljómsveitir þar á meðal einhverja stúlknahljómsveir svo Bermúda og að lokum Veðurguðina en þá gáfumst við upp eftir langan dag.  Tónleikarnir stóðu til kl. 23:00 um kvöldið og áttu víst margir eftir að koma fram. Kíkiði á myndirnar.

Veðurguðirnir tóku að sjálfsögðu Bahama ------- eyja.  Myndin tekin 31.05.2008 á Víðistaðatúni í Hafnarfirði.

Ég hef verið rólegur í tíðinni síðustu daga.  Ástæðan er að ég hef verið í smá framkvæmdum heimavið og því ekki gefið mér tíma til að fara út með vélina.  Þó tók ég löngu leiðina heim þann 17. maí. Langa leiðin heim er að keyra út á Álftanes og rétt aðeins að fá tilfinninguna fyrir fuglunum og fara svo heim. Ég hef þá gjarnan myndavélina með.  Tók m.a. þessa mynd af margæs á Hlíðsnesi.

Margæs á Hlíðsnesi.  Myndin tekin 17. maí 2008.

Þá eru myndirnar af þangskurðarvélinni komnar inn.  Eini gallinn er sá að þær koma ekki í réttri tímaröð svo þið skulið líta á þetta sem gestaþraut í leiðinni.  Hvaða mynd er fyrst og hver kemur svo síðust.

Þangskurðarvélin utan í Súgandisey.  Myndin er tekin 10. maí 2008 í Stykkishólmi.

Myndir af þangskurðarvélinni hafa ekki skilað sér inn þrátt fyrir að mynd úr þeirri möppu sé í síðasta bloggi.  Er að skoða þetta.

Þangskurðarvél rak upp í grjótgarðinn við höfnina í Stykkishólmi.  Sjá nánari frétt á eftirfarandi slóð.    http://stykkisholmsposturinn.is/?i=1&o=1431
Ég náði ekki myndum þar sem þangskurðarvélin var fyrst strand en fyrstu myndirnar mínar eru þegar verið var að draga vélina frá strandstað.  Ekki gekk vel að draga vélina því mikill vindur var og rak vélina upp í Súgandisey og þurfti "dráttarbáturinn" að sleppa tauginni og færa sig til að ná vélinni út.  Síðan var vélin dregin inn í höfnina í Stykkishólmi og á sama tíma kom ferjan Baldur inn og mátti halda að það ætti að stíma á þangskurðarvélina eins og sjá má hér.  Setti inn  möppu með myndum af björguninni.

Baldur á fullri ferð og virðist ætla að kafsigla þangskurðarprammann.  Myndin tekin 10. maí 2008.

Ég hef verið að skoða margæsir á Álftanesinu síðustu daga og finna merkta fugla og lesa merkin á þeim.  Ég geri þetta svona til að hafa gaman af.  Með því að gefa síðan upp merkin þá fæ ég til baka sögu fuglsins, hvenær hann var merktur, hver merkti, hvar merktur, hvar hann hefur séðst síðan hann var merktur í upphafi o.s.frv. 

Margæsir á flugi við Skógtjörn á Álftanesi. Myndin er tekin 03. maí 2008.

Margæsirnar eru núna farnar að kroppa gras á túninu við Katrínarkot. 
Myndin tekin 03. maí 2008.

Það er nú meiri dírðin úti þessa dagana og ekki leiðinlegt að heyra lóuna syngja dírðin, dírðin.  Kanski hún syngi dirrindí, dirrindí eða eitthvað annað, hver veit.  Ein mynd hér af syngjandi lóu og þið ákveðið bara sjálf hvað hún syngur. 

Dírðin, dírðin.........myndin tekin á Álftanesi 01. maí 2008

Hef ekkert sett hér inn í nokkra daga enda hef ég ekki verið neitt á ferðinni.  Það er samt allt að gerast, fuglar flykkjast inn, grasið farið að grænka og almanakið segir að sumarið sé komið.  Krókusarnir komnir upp úr moldinni og krían farin að sjást við landið.