Það eru margir sem hafa sett inn upplýsingar um þennan bát og því engar nýjar fréttir frá mér.  En ég sá þennan á Blönduósi og myndaði hann.  Nú loksins set ég myndirnar af honum og upplýsingar um hann hér á síðuna mína. 

Jón Forseti

Smíðaður í Bátastöð Jóhanns L. Gíslasonar, Hafnarfirði 1980. Fura og eik.  Valmet 1984 vél.  Í bókinni íslensk skip nr. 4, bls. 122, Kári VE 7 er sagt að það hafi verið Mercedes Benz dísel vél í bátnum. 

Eigandi Gunnar Þór Sigurðsson Vestmannaeyjum, frá 28. Janúar 1984.  Frá 28. Febrúar 1984 heitir skipið Sætindur HF 63, sami eigandi og áður.  Skipið er skráð í Hafnarfirði 1989.

Afskráður 2. des. 1994 og átti þá að úreldast, en var á skrá í október 1995 og var þá breytt í skemmtibát. Átti að fá nafnið Vitinn GK en ekkert varð úr því og þeim kaupum sem þá höfðu farið fram var rift. Báturinn var þá seldur til Færeyja í maí 1997, en fór aldrei og stóð uppi í Grófinni fram í maí 1999 að hann var kominn á skrá á ný.

Skráður sem vinnubátur frá maí 2003 og síðan nokkrum dögum síðar sem skemmtibátur. Slitnaði frá bryggju á Blönduósi 2005 og rak upp í sandfjöru, en tjón varð lítið. Eftir það stóð báturinn lengi vel á bryggjunni á Blönduósi, en hvort svo sé enn veit ég ekki.

Nöfn: Kári VE 7, Sætindur HF 63, Valdi RE 48, Pálmi RE 48, Magnús KE 46, Magnús, Jón Forseti

Þegar báturinn hét Magnús KE 46 var eigandi hans Erling Brim Ingimundarson.

07. ágúst 2013 er Jón Forseti uppi á bryggju á Blönduósi.

Upplýsingar:

            Íslensk skip, bók 4, bls. 122, 1677 Kári VE 7.

            Skipamyndir og skipafróðleikur Emils Páls

1677 Jón Forseti uppi á bryggju á Blönduósi 07. ágúst 2013

5852 Haförn ÞH 26 ex Kristján ÞH 26

Smíðaður á Húsavík 1953.  Eik og fura.  4,2 brl. 70 ha. Mermaid. Eigandi Helgi Kristjánsson Húsavík frá 4. febrúar 1954.  Báturinn var seldur 3. ágúst 1966 Sigurði Jónssyni Húsavík hét Fram ÞH 26.  Seldur 30. ágúst 1977 Ólafi Á Sigurðssyni Húsavík, hét Haförn ÞH 26.  Seldur 23. janúar 1991 Ásþóri Sigurðssyni Húsavík.  Frá 29. apríl 1992 er báturinn skráður Haförn ÞH 171.  Talinn ónýtur og tekinn af skrá 30. mars 1994.

Upplýsingar: 

           Íslensk skip, bátar.  Bók 4, bls. 141 og 142, Kristján ÞH 26.

Haförn ÞH 26, við bryggju á Húsavík 1985.

Á göngu um hverfið mitt myndaði ég meira af haustinu.  Nú fann ég litapallettu haustsins 2015.  Litirnir eru glæslilegir að mínu mati.

Litapalletta haustsins 2015.  Hafnarfjörður 06. október 2015

5027 Rúna SH 33
Smíðaður í Hvallátrum 1956.  Eik og fura.  3,22 brl. 8 ha. Solo vél.
Eigandi Höskuldur Pálsson, Stykkishólmi frá 12. mars 1969, þegar báturinn var fyrst skráður.  Seldur 15. júlí 1984 Svavari Magnússyni, Grundarfirði.  Seldur 10. janúar 1986 Guðna Guðnasyni, Grundarfirði.  Guðni seldi bátinn 21. apríl 1986 Valentínusi Guðnasyni og Ólafi Sigurðssyni, Stykkishólmi.  Um 15. október 1993 eru skráðir eigendur bátsins Ágúst K. Bjartmars og Árni Helgason, Stykkishólmi, sama nafn og númer.  Báturinn skráður í Stykkishólmi 1997.

2027 Rúna SH 33.  Stykkishólmur 21. apríl 2012

Þann 21. apríl veitti ég því athygli að Ágúst Bjartmars var að mála botninn á Rúnu.  Ég fór og ræddi við hann.  Ágúst kvaðst vera eigandi bátsins ásamt ættingum Árna Helgasonar heitins.  Hann kvaðst nú eiginlega sjá um bátinn orðið einn. 
Rúna var í upphafi byggð sem skip og það hafi verið rétt eftir aldamótin 1900, 1905 hélt Ágúst.  Báturinn var notaður sem flutningaskip.  Þegar Höskuldur Pálsson eignaðist bátinn þá hækkaði hann bátinn um tvö borð, setti á hann afturstefni og setti í hann vél og hús.  Báturinn var afturbyggður. 
Ágúst kvaðst hafa smíðað nýtt hús á bátinn þegar þeir hafi eignast bátinn, um 1993, og þá sett húsið að framan.  Báturinn hafi ekki verið notaður til að róa til fiskjar heldur meira að flytja fólk út í eyjar.  Það geta 5-6 manns setið inni í húsinu í einu.  Ágúst sagði bátinn frábæran sjóbát.

Ágúst K. Bjartmars með pensil í hönd.  Stykkishólmur 21. apríl 2012

Nú velti ég því fyrir mér hvað sé rétt um upphaf bátsins.  Ágúst segir bátinn smíðaðan um 1905 sem skip.  Þegar svo Höskuldur eignast bátinn er hann borðhækkaður en ekki skráður fyrr en 1969.  Hvort er rétt ætla ég ekki að dæma um en læt þessa frásögn Ágústar njóta sín eins og hann sagði hana.  Góð saga má ekki gjalda sannleikans:-)

05.10.2015

Í dag sá ég að það var verið að taka Rúnu upp hér í Hafnarfirði.  Ég smellti nokkrum myndum af því og svo af núverandi eiganda, Viðari Ægis.  Ég spurði hann hvort það yrðu nafnaskipti en hann neitaði því og sagðist ekki breyta neinu, hann hefði sama nafn, númer og allt.  Hann er að taka bátinn upp því það þarf eitthvað smávegis að gera við heyrðist mér.

Nýr eigandi af Rúnu SH 33, Viðar Ægis.  Hafnarfjörður 05. október 2015

Upplýsingar:
Íslensk skip, bátar - bók 4, bls. 171.
Munnlegar upplýsingar, Ágúst K. Bjartmars.

Þegar veðrið er fallegt hef ég gaman af að taka myndir við höfnina.  Þá heillar mig svolítið að taka myndir af öllu þessu kraðaki báta sem er þarna bundinn við bryggju.  Þegar ég horfi á þessar myndir þá er í raun allt í einni hrúgu og nánast ekki hægt að átta sig á hvað er hvað.  Í þessu finnst mér birtan skipta máli.  Hér getið þið séð hvað ég á við.

Kraðak í Hafnarfjarðarhöfn 05. október 2015

Ólafur kom að landi í dag en hann er greinilega á makrílveiðum.  Skipperinn var að þvo körin og fannst mér það koma vel út þegar vatnsúðinn ýrðist um allt.

Ólafur HF 200 í Hafnarfjarðarhöfn 05. október 2015

Þvottur að lokinni löndun.  Hafnarfjörður 05. október 2015

Kíkti niður á höfn hér í Hafnarfirði og tók slatta af myndum.  Hér eru tvær sem sýna að allt er á hvolfi m.a. Jón Forseti.  Ætli hann hafi verið þannig karlinn? :)

Empiricus við Hafnarfjarðarhöfn 05.10.2015

Jón Forsetir á hvolfi.  Hafnarfjörður 05.10.2015

5216 Rannsý RE 18

Smíðaður árið 1973 af Eyjólfi Einarssyni í Hafnarfirði.  Fura og eik.  Vélin er Volvo Penta 35 ha. árg. 1988.  Hét Sæfinnur KE 145.  Eigendur Sverrir Einarsson, Leifur Einarsson, Sverrir Elentínusson og Kristján Júlíusson, Keflavík, frá 24. apríl 1973. 

Þeir selja bátinn 23. febrúar 1979 Friðriki Guðmundssyni, Hafnarfirði, hét Jón Erling HF 26.  Báturinn var tekin af skrá 17. nóvember 1986 en endurskráður 24. júní 1987. 

Seldur 23. september 1992 Eyjólfi Einarssyni, Hafnarfirði, hét Bylgjan HF 26.  Seldur 6. maí 1994 Halldóri Páli Halldórssyni, Keflavík.  Báturinn heitir Bylgjan KE 17.  Báturinn var skráður sem skemmtiskip 2005.

Held að það sé rétt hjá mér að nýverandi eigandi heiti Sigurður Helgason.  Heitir Rannsý RE 18 í dag.

Önnur nöfn
Sæfinnur KE 145, Jón Erling HF 26, Bylgjan HF 26 og Rannsý RE 18.

Heimildir
www.sax.is
Íslensk skip, bátar, bók 2, bls. 161 - Sæfinnur KE 145

Rannsý RE 18, Reykjavíkurhöfn 13. september 2011

Rannsý RE 18 komin í nýjan lit.  Hafnarfjörður 03. október 2015

Rakst á þennan við Hafnarfjarðarhöfn 03. október 2015 og eftir smá stund vildi ég meina að þetta væri Rannsý RE 18.  Ég átti myndir af bátnum þegar hann var gulur og bar þessar myndir saman og get ekki séð annað en að þetta sé Rannsý. Ég veit ekki um hvort það hefur verið einhver breyting á eignarhaldi en þær upplýsingar munu þá koma síðar.  Ef þú hefur einhverjar meiri upplýsingar um þennan bát endilega sendu mér línu.