Máninn hátt á himni skýn

09.12.2012 21:30

Sumrungur KÓ

Sigurður Bergsveinsson sendi mér grein um bátinn Sumring KÓ sem ég set inn hér á eftir. En fyrst vil ég setja smá fyrirspurn frá honum til ykkar allra sem lesið þetta.

Sigurður fór að spá í innfellda stefnið eins og sést í greininni. Gaman væri ef menn sem þekktu til vildu tjá sig um það. Hvar voru bátar með svona stefni smíðaðir annarsstaðar en hjá Skipasmíðastöð KEA og Bátasmíðastöð Breiðfirðinga og í Látrum ?

Pabbi og Aðalsteinn Aðalsteinn í Látrum voru vinir (og frændur) og það er ekki útilokað þó ég viti ekkert um það að stefnin á Draupni og Farsæli séu tilorðin fyrir áhrif frá pabba.

kv,

Sumrungur KÓ

Saga báts

Faðir minn Bergsveinn Breiðfjörð Gíslason, skipa- og bryggjusmiður, byrjaði að læra skipasmíði árið 1938 hjá Valdimar Ólafssyni frænda sínum í Hvallátrum í Breiðafirði. Þá voru þar einnig við nám Einar B. Sturluson og Þorbergur Ólafsson sem seinna stofnuðu ásamt fleirum Bátasmíðastöð Breiðfirðinga, sem seinna hlaut nafnið Bátalón. Valdimar dó aðeins 34 ára gamall vorið 1939 og faðir minn lauk því sínu námi hjá skipasmíðastöð KEA á Akureyri árið 1945.

Strax að loknu námi hóf faðir minn að vinna við bryggjusmíði hjá Vita- og hafnarmálastofnun og varð það hans helsti starfsvettvangur í áratugi. Eftir að Þorbergur og Einar stofnuðu sitt fyrirtæki árið 1947 vann faðir minn oft hjá þeim á veturna þegar hlé var á bryggjusmíðum. Vann hann gjarnan við að teikna báta ásamt smíðum o.fl.

Veturinn 1955 teiknaði faðir minn bát sem hann smíðaði síðan um vorið. Byrjað var á smíðinni 1. apríl og 19. apríl var lokið við að byrða bátinn. Þann 28. maí er báturinn sjósettur og gaf dr. Broddi Jóhannesson bátnum nafnið - Sumrungur. Athygli vekur hvað menn voru snöggir að smíða svona bát. Þetta var um tveggja mánaða ferli.

Sumrungur var 8,72 m á lengd, 2,9 m á breidd og 1,09 m á dýpt. Hann mældist 5,26 brl. og vélin var 16 ha Lister. Skipaskrárnúmer 1257.

Eins og sést á myndunum svipar Sumrungi mjög til DAS happdrættisbátanna sem smíðaðir voru á sama tíma hjá Bátasmíðastöð Breiðfirðinga. Faðir minn vann við að teikna þá báta og því ekki skrýtið að Sumrungur líktist þeim. Sumrungur var með innfelldu stefni eins og flestir happdrættisbátarnir. Hjá KEA voru flestir bátar smíðaðir með innfellt stefni eins og sjá má á Húna II á Akureyri. Ekki er ólíklegt að faðir minn hafi haft áhrif á að margir bátar sem smíðaðir voru hjá Bátasmíðastöð Breiðfirðinga voru með slíku stefni.

Sumrungur á Skerjafirði

Samkvæmt dagbók þá siglir faðir minn Sumrungi til Reykjavíkur þann 17. júní. 1955 Ekki kemur fram hvert erindið var en næsta mynd gæti verið tekin við það tækifæri.

Sumrungur fyrir utan Reykjavík.

Faðir minn notaði bátinn til fiskveiða og réri frá Kópavogi þar sem við áttum heima. Róið var með handfæri, þorsk-, ýsu- og hrognkelsanet og einnig var byssan ævinlega með og fugl skotinn ef færi gafst. Ég fór nokkrum sinnum með og hafði gaman af.

Þann 30. nóvember 1956 slitnaði Sumrungur í vestan roki upp frá legufærum sínum þar sem nú er höfnin í Kópavogi og rak upp í fjöru þar sem nú er Bakkabraut. Faðir minn vann þá við að lengja gömlu bryggjuna í Kópavogi og hægt var að bregðast strax við og hífa bátinn á land. Skemmdir urðu litlar. Það var fjör hjá okkur strákunum að fylgjast með þessum atburði.

Í maí 1957 selur faðir minn Sveinbirni Samsonarsyni frá Þingeyri bátinn. Sveinbjörn nefnir bátinn Svan ÍS 28. Sveinbjörn réri bátnum til fiskveiða frá Þingeyri. Hann dekkar bátinn og setur í hann 35 ha Volvo Penta vél.

Í nóvember 1967 kaupir Þorsteinn Stefánsson smiður á Tálknafirði bátinn af Sveinbirni og greiðir honum 210.000 kr. fyrir. Bátinn nefndi hann Otur BA 27. Þorsteinn réri bátnum til ársins 1973 og að hans sögn var þetta listabátur og fiskaðist oft vel á hann. Mesti afli í róðri var um 4 tonn.

Otur BA 27 á Tálknafirði. Myndir í eigu Þorsteins Stefánssonar

Samkvæmt Íslensk skip I bls. 64 er saga bátsins eftir þetta sem hér segir.

9. júlí 1973, eigandi Tyrfingur Agnarsson, Reykjavík, Otur RE 150
16. mars 1974, eigandi Guðmundur Friðriksson, Vestmannaeyjum, Sigursæll VE 17
10. júní 1975, eigendur Hlöðver Helgason og Gunnar og Sævar Hlöðverssynir, Reykjavík, Kópur RE 86
31. maí 1977, eigendur Agnar R. Snorrason Húsavík og Snorri Agnarsson Reykjavík, Kópur RE 86. Árið 1978 er gert við bátinn í Bátalóni og þá er sett í hann 38 ha Thornycroft vél.
1. des. 1981, Báturinn er talinn ónýtur og tekinn af skrá.

Sigurður Bergsveinsson, desember 2012.

Heimildir:

Dagbækur og myndasafn Bergsveins Breiðfjörð Gíslasonar
Viðtöl við Þorstein Stefánsson
Íslensk skip, eftir Jón Björnsson
Gögn í Þjóðskjalasafni frá Siglingastofnun ríkisins
Eigin minningar

Skrifað af Rikki R.

05.12.2012 21:31

Ellefu tindar

Nú er ég búinn að setja inn allt sem ég hef fundið um tindana, til þessa. Á eftir að finna meira síðar en vildi koma þessu frá mér.

Við þessa vinnu þá hef ég hugsað, stundum fullmikið en kanski var ekki þörf á þegar á allt er litið.

Ég skrifaði um Fleyg ÞH 301 ex Svan GK. Þar segi ég að Fleygur sé forveri DAS bátanna. Þetta er ég farin að efast um. Tindarnir eru smíðaðir frá 1954-1958. Fyrsti bátur dregin út í janúar 1955. Fleygur var smíðaður 1955, spurning hvenær árs hann fór á flot, smíðin gæti hafa fylgt DAS bátunum, en forveri veit ég ekki.

Ég talaði við annan eiganda bátsins, sem þá hét Svanur GK, Þórodd Vilhjálmsson sem viðurkenndi að hafa sagt einhverjum að þetta væri DAS bátur. Það sagðist hann hafa gert því honum þótti vænt um bátinn og vildi ekki að honum yrði fargað.

Fleygur ÞH 301, smíðaður 1955, 5,38 brl. Mynd Hafþór Hreiðarsson

Þá hefur verið minnst á Guðmund Jón SI 22. Talað hefur verið um að hann væri einn af DAS bátunum en svo er ekki. Báturinn hefur alla tíð heitið Guðmundur Jón. Hann var smíðaður í Hafnarfirði 1953 og hafi hann verið smíðaður í Bátasmiðju Breiðfirðinga þá er hann líklega forveri DAS bátanna, því gæti ég trúað. Mér datt fyrst í hug hvort hann væri hinn glataði Kofratindur en sá var smíðaður 1958 svo það stenst ekki. Og fyrst Guðmundur Jón var smíðaður 1953 þá var ekki byrjað að smíða Tindana, nema kanski þann fyrsta Heklutind. Ef Guðmundur Jón er báturinn sem sagt er frá hér í greininni að neðan, að hann hafi verið settur upp við Hrafnistu í Reykjavík fékk ég þær fréttir frá stjórnarmönnum DAS að líklega hafi báturinn bara grotnað niður þar. Þó virðist ekkert vera vitað af því hvort báturinn hafi verið settur upp við Hrafnistu. Ég velti fyrir mér hvort sama væri upp á teningnum með Guðmund Jón og Fleyg. Að það hafi verið sagt að þetta væri einn af DAS bátunum bara til að varðveita hann. Alla vegna, Guðmundur Jón var smíðaður ári á undan DAS bátunum.

Guðmundur Jón SI 22. Mynd af Siglfirska fréttavefnum, http://157.157.96.74/gamli/2005-04-.htm

Skrifað af Rikki R.

05.12.2012 21:15

Klukkutindur var síðastur

5925 Klukkutindur RE 211

Smíðaður í Bátalóni í Hafnarfirði 1958. Eik og fura. 4,63 brl. 48 ha. sagður með Torneycroft vél en allar vélar sem settar voru í upphafi voru Lister díesel vélar og líklegt að skipt hafi verið um vél.

Sá ellefti og síðasti af svokölluðu DAS bátum. Hét upphaflega Klukkutindur RE 211, 5925.
Klukkutindur var dreginn út hjá happdrættinu þann 03. maí 1958 og kom á miða nr. 19420, eigandi miðans var 17 ára stúlka, Hulda Kristinsdóttir, Reykjavík sem þá var jafnframt fyrsti eigandi bátsins.

Hulda Kristinsdóttir við stýrið. Mynd úr afmælisriti DAS.

Hulda Kristinsdóttir um borð í Klukkutindi. Mynd úr safni DAS.

Eiganda er ekki getið fyrr en 1962 en báturinn mun hafa verið skráður í Reykjavík. Seldur 31. október 1962 Sigurði Runólfssyni, Hlíð, Hellissandi, hét Klukkutindur SH 102. Seldur 28. nóvember 1994 Krossi hf, Stöðvarfirði. Báturinn heitir Klukkutindur SU 102 og er skráður á Stöðvarfirði 1997.

Eftirfarandi auglýsing var birt í Tímanum, laugardaginn 26. maí 1962.

31. október 1962 er báturinn seldur Sigurði Runólfssyni, Hlíð, Hellissandi, hét Klukkutindur SH 102. Seldur 28. nóvember 1994 Krossi hf., Stöðvarfirði. Báturinn heitir Klukkutindur SU 102 og er skráður á Stöðvarfirði 1997.

Morgunblaðið 22. ágúst 1997 um Klukkutind en þar er sagt að hann fari á safn.

Klukkutindur fer á safn

Ólafsvík - Í sumar var trébáturinn Klukkutindur staðsettur í sjómannagarðinum á Hellissandi, en þar er Sjóminjasafn Hellissands. Sjómannadagsráð Hellisands hefur veg og vanda af safninu og er með einn starfsmann á sumrin sem sér um að upplýsa ferðamenn.

Klukkutindur er einn af happdrættisbátum DAS, smíðaður árið 1958 og var hann dreginn út í happdrættinu það sama ár. Eftir því sem næst verður komist var það kona sem var svo heppin að fá bátinn. Báturinn var talinn mikil happafleyta en hann er síðasti báturinn sem reri frá Krossavík við Hellissand en Krossavík var lokað 1989. Þá gerði Sigurður Runólfsson frá Hellissandi hann út.

Morgunblaðið Wíum KLUKKUTINDUR /Guðlaugur í Sjómannagarðinum á Hellissandi.

Á ferðalagi um Snæfellsnes 18. maí 2012 fékk ég upplýsingar um að Klukkutindur væri í malarnámu við Rif. Ég kíkti á bátinn og verð að segja að það fari ekkert vel um hann þar sem hann er. Klukkutindur er orðinn fúinn, snúinn og mjög lúinn. Líklega verður ekkert gert með Klukkutind, ekki miðað við ástand hans. Til gamans, eða frekar sorglegt, má geta þess að ég greip í járn aftan á bátnum. Það rifnaði nánast af án átaka, svo fúinn er báturinn orðinn. Ef þetta sem kemur fram í grein morgunblaðsins er rétt og báturinn fór á safn þá er nokkuð ljóst að menn hafa gefist upp á bátnum, líklega vegna ástands. Of dýrt yrði að gera hann upp. Báturinn er ónýtur og þyrfti að smíða hann allan upp að mínu mati, smíða nýjan bát. Margar fleiri myndir af bátnum í albúmi, smellið á mynd til að skoða þær.

Séður að aftan virðist báturinn nokkuð réttur. Rif 18. maí 2012

Að framan má sjá hve undin báturinn er. Rif 18. maí 2012

Klukkutindur. Rif 18. maí 2012

Skrifað af Rikki R.

05.12.2012 20:53

Sólartindur er tíundi

5433 Sólartindur RE 61

Smíðaður í Bátalóni í Hafnarfirði 1958. Eik og fura. 4,5 brl. 32 ha. Lister vél.

Báturinn er 10. Happdrættisbáturinn frá DAS. Hann var dreginn út 3. mars 1958 og kom á miða nr. 55571 í eigu Kjartans Guðmundssonar, Ströndum, sem jafnframt er þá fyrsti eigandi bátsins.

Þegar báturinn er fyrst skráður er eigandi bátsins Benjamín Sigurðsson, Reykjavík, frá 17. apríl 1968. Ekki er getið um eigendur fyrir þann tíma. Benjamín selur bátinn 15. október 1974 Guðmundi Hólm Sigurðssyni, Þórshöfn, hét Sólartindur ÞH 11. Seldur 18. júlí 1976 Jóhanni Guðmundssyni, Þórhsöfn. Seldur 13. desember 1976 Guðmundi L. Guðmundssyni, Bala, Miðneshreppi, heitir Sólartindur GK 382. Seldur 28. september 1984 Jóhannesi Daða Halldórssyni og Haraldi Hinrikssyni, Keflavík, sama nafn og númer. Báturinn er skráður í Sandgerði 1997.

Ofangreindar upplýsingar eru fengnar í Íslansk skip, bátar en í yfirliti í þeirri bók koma fram tvær skráningar í viðbót við þessar þ.e. Sólartindur KE 18 og Sólartindur GK 382 aftur.

Í skipaalmanaki á veraldarvefnum má finna að Sólartindur er afskráður að beiðni eiganda 25. mars 2003.

Heimildir:

Íslensk skip, bátar.

Tímarit.is

Hér er mynd sem er í eigu Kristjáns Kristjánssonar og er á síðu Markúsar Karls Valssonar http://krusi.123.is/blog/2011/10/20/547594/ en myndin var sett inn á síðuna 20.10.2011.

Þessa mynd fann ég á heimasíður Arnbjörns Eiríkssonar sem tekin var 1990 http://stafnes.123.is/blog/2010/01/31/430854/

Á þessum myndum sem ég fann á heimasíðu Þorgeirs Baldurssonar http://thorgeirbald.123.is/blog/2009/07/28/391008/ og teknar voru af Emil Páli sést Sólartindur. Svona leit hann út í júlí 2009 en búið er að rífa hann mikið, setja á hann annað stýrishús og breyta á ýmsa vegu. Hvað verður svo um bátinn?

Meira síðar........................

Skrifað af Rikki R.

05.12.2012 20:45

Keilistindur átti að vera níundi

Keilistindur

Smíðaður í Bátalóni í Hafnarfirði 1957. Eik og fura. Um 4,5 brl. 18 ha. Lister vél.

Keilistindur er níundi happdrættisbáturinn og var dregin út á miða nr. 52311 sem var óseldur miði og rennur því báturinn aftur til happdrættisins.

Samkvæmt upplýsingum sem ég fékk frá DAS þá rann báturinn til Bátalóns aftur. Hvað varð um hann eftir þetta er ekki gott að segja. Upplýsinga verður leitað áfram.

Mér dettur helst í hug að báturinn hafi fengið annað nafn og skráður sem slíkur. Þá er ég að leita að bát sem var smíðaður í Hafnarfirði 1958 og hefur þetta DAS útlit......................einhver?

Meira síðar...................

Skrifað af Rikki R.

05.12.2012 20:33

Snætindur var áttundi

1024 Snætindur ÞH 120

Smíðaður í Bátalóni í Hafnarfirði 1957. Eik og fura. 6 brl. 18 ha. Lister díesel vél.

Snætindur er áttundir happdrættisbátur DAS og var dregin út 03. mars 1957 og kom á miða nr. 23351 sem var í eigu Jón Sig. Jónsson, netagerðarmanns á Akranesi, sem er þá fyrsti eigandi Snætinds. Til gamans má geta þess að Snætindur var 200 báturinn sem Bátalón í Hafnarfirði hafði smíðað.

Snætindur. Tíminn 06.03.1957

Snætindur til sölu, MBL 16. mars 1957

Jón selur bátinn strax. Næsti eigandi er Þorgrímur Kjartansson, Þórshöfn, Langanesi frá 6. Maí 1957. 1972 var sett í bátinn 31 ha. Lister díesel vél. 1979 var sett í hann 45 ha. Volvo Penta díesel vél. Báturinn var talinn ónýtur og tekinn af skrá 21. mars 1985.

Númer 200

Tíminn 06.03.1957

Bátalón í Hafnarfirði hefir smíðað 200 báta, hinn síðasti er Snætindur.

Bátasmíðastöðin Bátalón í Hafnarfirði, sem áður hét Bátasmíðastöð Breiðfirðinga, hleypti nýlega af stokkunum 200. bátnum, sem stöðin smíðar. Hefir stöðin nú starfað í tíu ár. Þessi bátur var happdrættisbátur DAS og nefnist Snætindur, og var dregið um hann í fyrradag.

Báturinn var til sýnis við Austurstræti um helgina og varð mörgum starsýnt á þennan fríða farkost. Bátar þeir, sem stöðin hefir smíðað, eru flest nótabátar og trillubátar, en sex þilfarsbátar eru þó einnig í þeim hópi. Stjórn stöðvarinnar skipa nú Þorbergur Ólafsson, Jóhannes Gíslason, Einar Sturluson, Sigmundur Bjarnason og Magnús Bjarnason.

Þjóðviljinn 17.02.1973

Tíminn 17.02.1973

Stærstu bátar Þórshafnarbúa upp í fjöru, smábátur sokkinn:

"ÖLDURNAR RISU EINS OG FJÖLL YFIR HAFNARGARÐINN" þegar menn brutust við mikinn háska út í bátana, sem eftir voru.

Þórshöfn varð fyrir þungu áfalli i norðanveðrinu i byrjun vikunnar. Tvo stærstu bátana rak upp i fjöru, og er hætt við, að þeir séu gerónýtir, auk þess sem litill bátur sökk. Öðrum bátum, sem lágu við bryggju, tókst að bjarga með miklu áræði og harðfengi. Skarðið, sem höggvið hefur verið i bátaflotann, er mjög tilfinnanlegt, og mun meðal annars hafa i för með sér mikla atvinnuskerðingu á Þórshöfn i vetur.

Svo er sagt frá því að Snætindur hafi sokkið við bryggju á Þórshöfn, báturinn sé um sex lestir, eigandi Þorgrímur Kjartansson.

Skrifað af Rikki R.

02.12.2012 22:10

Hólmatindur var sjöundi

Hólmatindur RE 71, 5483

Smíðaður í Bátalóni í Hafnarfirði 1956. Eik og fura. 4,67 brl. 18 ha. Lister vél.

Hólmatindur er sjöundi happdrættisbáturinn og hann var dregin út 03. ágúst 1956 og kom á miða nr. 7253, eigandi miðans og fyrsti eigandi Hólmatinds var Páll Beck, Kópavogi, blaðamaður á Vísi. Páll er að öðrum þræði sjómaður. Þess má til gamans geta að Páll er alinn upp í Reyðarfirði undir hlíðum Hólmatinds. Páll selur bátinn fljótlega.

Eggert Bjarni Kristjánsson, Reykjavík kaupir bátinn 24. febrúar 1957. Eggert selur bátinn 29. des. 1960, Geir Ágústssyni, Raufarhöfn, hét Hólmatindur ÞH 103. Seldur 2. septeber 1972 Gunnlaugi Óskarssyni, Sæbergi, Presthólahreppi. Frá 2. september 1979 voru Gunnlaugur Óskarsson og Jón Jóhannsson, Njarðvík, skráðir eigendur bátsins, sem hét þá Hólmatindur GK 203. Seldur 20. júlí 1980 Hauki Reyni Ísakssyni, Kópavogi. Seldur 2. júlí 1982 Grétari Sigurðssyni og Guðmundi Valdimarssyni, Keflavík, en þeir seldu bátinn sama dag Halldóri Grímssyni og Skúla Halldórssyni, Akranesi. Báturinn er ekki umskráður. Seldur 9. mars 1983 Skúla Berg Halldórssyni, Patreksfirði, hét Hólmatindur BA 203. Seldur 21. mars 1985 Gunnari Stefánssyni og Svavari Matthíassyni, Akranesi, hét Ölver AK 82. Seldur 4. júní 1985 Hreini Gíslasyni, Grenivík, hét Ölver ÞH 146. Seldur 12. janúar 1986 Hallgrími S. Gunnþórssyni, Borg, Grenivík, hét Hugrún ÞH 240. Seldur 5. desember 1991 Guðbjörgu Herbertsdóttur, Grenivík, sama nafn og númer. Báturinn var talinn ónýtur og tekinn af skrá 29. janúar 1997.

Dagar Hólmatinds eru ekki taldir. Ég fann grein í Brimfaxa síðan í júní 2010. Greinina getiði séð alla hér http://brimfaxi.goggur.is/brimfaxi/1.tbl.2010.pdf en þar kemur m.a. fram. Flestir þessara báta hafa týnt tölunni, fæstir ef nokkrir á sjó í dag en einn heillegastur er bátur sem er á Grenivík og stendur þar uppi við hlið Útgerðarminjasafnsins á Grenivík. Þetta er Hugrún ÞH 240, sem upphaflega hét Hólmatindur RE 71, vinningur í happdrætti DAS í ágústmánuði 1956. Báturinn kom til Greinvíkur frá Akranesi 1986, þá í eigu Hreins Gíslasonar, en var ósjófær. Þá fær hann nafnið Ölver ÞH 215. Bátinn eignaðist síðan Svavar Gunnþórsson og setti í hann 82 ha. Ford Mermade-vél en árið 1996 er hann úreltur og síðan gefinn Útgerðarsafninu á Greinivík. Svavar gerði hann upp fyrir hreppsfélagði.

Hugrún ÞH 240 ex Hólmatindur RE 71. Mynd úr Brimfaxa, 2010.

Mynd sem Jóhannes Guðnason tók, mynd af síðu Emils Páls.

Heimild:

Íslensk skip, bátar

Brimfaxi, júní 2010

Tímarit.is

Skrifað af Rikki R.

02.12.2012 21:49

Búlandstindur var sjötti

Búlandstindur

Smíðaður í Bátasmiðju Breiðfirðinga í Hafnarfirði 1956. Eik og fura. 4.67 brl. 18 ha. Lister vél.

Búlandstindur er sjötti happdrættisbáturinn í röðinni og var dregin út 03. mars 1956, kom á miða nr. 27642 sem var í eigu Þorleifs Sigurbrandssonar, Reykjavík, og er hann því fyrsti eigandi bátsins. Þorleifur hefur ákvðið að selja bátinn strax.

Mynd úr safni DAS

Morgunblaðið laugardaginn 24. mars 1956 er sagt frá svaðilför Búlandstinds

Þeir sem áttu leið um Hafnarfjarðarveg í fyrrakvöld (fimmtudaginn 22. mars 1956), sáu hvar þessi stóri trillubátur lá úti í skurði við brúna í Kópavogi. Verið var að flytja bátinn til Reykjavíkur frá Hafnarfirði. Heitir báturinn Búlandstindur og var í síðasta happdrætti Dvalarheimilisins. Hefur hann verið seldur út á land. Þarna við brúna slitnaði vagninn, sem báturinn var á, aftan úr bílnum sem dró hann. Fór vagninn með bátinn út í skurðinn þar sem báturinn valt af. Ekki urðu á honum neinar skemmdir. Með krana og tilfæringum var báturinn tekinn upp úr skurðinum og settur á vagn og fluttur síðar um kvöldið til Reykjavíkur.

Tíminn laugardaginn 14. apríl 1956, hluti úr grein

Fyrir skömmu var keyptur hingað til Þórshafnar nýr trillubátur, Búlandstindur, sem kom frá happdrætti Dvalarheimilis aldraðra sjómanna.

Ekki liggur saga Búlandstinds á lausu og mun ég halda áfram að grafa upp allt sem ég finn. Ef þið hafið einhverjar upplýsingar endilega látið þær koma.

Meira síðar.............................

Skrifað af Rikki R.

02.12.2012 20:58

Fimmti var Kofratindur

Kofratindur

Smíðaður í Bátasmiðju Breiðafjarðar í Hafnarfirði 1955. Eik og fura.

Vélbáturinn Kofratindur er fimmti happdrættisbáturinn. Hann var dregin út 08. janúar 1956, kom á miða númer 32051 sem var í eigu Ólafs Jakobssonar, Ísafirði, sem er þá fyrsti eigandi Kofratinds.

Lítið hef ég fundið um Kofratind nema að greinilegt er að Ólafur Jakobsson hefur ákveðið að selja bátinn strax. Kofratindur var auglýstur til sölu 31. janúar 1956, 4. apríl 1956 og aftur 13. maí 1956.

Mynd af Heklutindi.

Mynd af Heklutindi

Enn eina söluauglýsinguna fann ég 30. maí 1958, þar heitir báturinn Sæbjörg VE 313 (áður Kofratindur).

Önnur auglýsing var í Fylkir í Vestmannaeyjum 30. maí 1958. Þar er talað um Happdrættisbátinn Sæbjörgu (áður Kofratind).

Eina sem ég get sagt er að báturinn var dreginn út og Ólafur Jakobsson Ísafirði eignast bátinn. Hann selur hann strax eða fjótlega. Greinilegt er að báturinn hefur svo farið til Vestmannaeyja því hann er auglýstur þar til sölu sem Sæbjörg VE 313, 30. maí 1958. Síðan hefur ekkert til hennar spurst.

Þetta fer að verða eins og sagan um búkollu, útgáfuna hans Ladda.

Þar sem ég hef engar upplýsingar þá get ég bara dregið áliktanir á því litla sem ég hef og þið sjáið hér. Það er þó eitt sem ég velti fyrir mér miðað við skort á upplýsingum og það er nafnið Sæbjörg. Í auglýsingunni er talað um "opin trillubát með bensínvél". Ég hef þær upplýsingar að allir DAS bátarnir hafi verið með Lister vél, þó er ekkert sem segir að ekki hafi verið skipt um vél.

Ég fékk eina mynd frá DAS sem sýnir bát sem heitir Sæbjörg. Ekki er vitað hvort þessi bátur var einn af DAS bátunum og engar upplýsingar um þennan bát hjá DAS. Ég set þessa mynd hér inn svo þið getið skoðað hana. Ef þið hafið einhverjar upplýsingar um þennan bát eða Kofratind þá endilega látið í ykkur heyra.

Sæbjörg. Mynd úr safni DAS

Meira síðar ...............

Skrifað af Rikki R.

28.11.2012 22:09

Maron

Smellti þessari á Maron en það var verið að landa úr honum í Njarðvíkurhöfn þegar ég var þar á ferð. Ætli þetta sé þá ekki stálverkur. Fannst birtan flott og hvernig máninn fylgist vel með öllu sem gerist.

Maron HU 522. Njarðvík 25. nóvember 2012

Skrifað af Rikki R.

28.11.2012 21:39

Arnartindur sá fjórði

Arnartindur GK 212

Smíðaður í Bátasmiðju Breiðafjarðar í Hafnarfirði 1955. Eik og fura. 4,25 brl. 16 ha. Lister vél.

Arnartindur var fjórði happdrættisbáturinn frá DAS, hann var dregin út 3. júní 1955 og kom á miða nr. 4978, sem var í eigu Ásgeirs Höskuldssonar, Mosfellsbæ sem er þá fyrsti eigandi Arnartinds.

Ásgeir stundaði nám í verkfræði og seldi því bátinn til að fjármagna nám sitt erlendis.

Arnartindur, Höskuldur Ágústsson, Ásgerður Höskuldsdóttir og Auðunn Hermannsson.
Mynd úr safni DAS

Ásgerður Höskuldsdóttir við Arnartind. Mynd úr safni DAS

Seldur 1. júlí 1955, Gunnari Karlssyni, Ási og Guðjóni G. Karlssyni, Karlsskála, Grindavík. Báturinn seldur 15. október 1960 Karli G. Karlssyni og Ingibergi Karlssyni, Karlsskála. Báturinn fórst á Járngerðarstaðasundi 2. Febrúar 1961. Þrír menn voru í áhöfn bátsins. Einn fórst og tveir björguðust.

Alþýðublaðið föstudaginn 8. júlí 1955 skýrir frá því að í dag sé nýr bátur á leiðinni til Grindavíkur. En það er báturinn Arnartindur sem verður GK 212. Í gærkveldi átti að setja bátinn á flot í Bátasmiðastöð Breiðfirðinga í Hafnarfirði. Báturinn sé eign þriggja bræðra, Karls Gunnars, Guðjóns G. og Ingibergs Karlssona.

Morgunblaðið föstudaginn 19. október 1956 var Arnartindur auglýstur til sölu.

Alþýðublaðið, föstudaginn 3. febrúar 1961.

Bátur ferst við Grindavík

Þilfarsbáturinn Arnartindur GK 212 fórst í gærdag (fimmtudaginn 02. febrúar 1961) um klukkan 3 á Brimsundi við Grindavík. Þegar hann var að koma úr róðri. Á bátnum voru þrír menn og drukkanði einn þeirra, Ingibergur Karlsson, Karlsskála í Grindavík. Hann var tæpra 43 ára, fæddur 5. mars 1917. Hann lætur eftir sig aldraða móður.

Tildrög slyssins eru þau að þegar Arnartindur, sem er 5 lesta þilfarsbátur, var að koma úr róðri, um þrjúleitið var komið foráttubrim. Arnartindur var á leið til hafnar í Grindavík en innsiglingin er mjög þröng og hættuleg. Á Brimsundi hvoldi bátnum.

Atburðurinn sást úr landi og fór vélbáturinn Ólafur, 22 lestir, út til að reyna að bjarga mönnunum. Ólafur var nýkominn úr róðri. Skipstjóri á honum er Einar Dagbjartsson.

Skipverjum á Ólafi tókst að bjarga einum manni af Arnartindi, Berþór Guðmundssyni, til heimilis að Aðalstræti 13, Akureyri. Þegar að var komið hélt Berþór sér á floti á belgjum.

Nokkuð löngu síðar sáu menn úr landi einhverja þústu i sjónum. Héldu menn að þarna væri selur. Einhver sótti samt sjónauka og þá kom í Ijós að það var maður á floti. Var brugðið skjótt við og bátur sendur út manninum til bjargar. Hann heitir Einar Jónsson, Járngerðarstöðum í Grindavík. Hann er kvæntur og á fjölda barna. Einar bjargaðist nær klukkustund eftir að Arnartindi hvolfdi og hafði hann þá verið á sundi allan tímann. Er talið að ekki hafi mátt dragast mínútum lengur að honum yrði bjargað.

Báturinn sem fórst, Arnartindur, er einn af happdrættisbátum Dvalarheimilis aldraðra sjómanna.

Heimild:

Íslens skip, bátar

Tímarit.is

Skrifað af Rikki R.

28.11.2012 20:52

Litlitindur var þriðji

5659 Litlitindur VE 326

Smíðaður í Bátasmiðju Breiðafjarðar í Hafnarfirði 1954. Eik og fura. 3.83 brl. 22 ha. SABB vél.

Litlitindur er þriðji báturinn í röðinni af DAS bátunum. Hann var dreginn út 3. apríl 1955 og var Haraldur Sigurðsson, Reykjavík sá heppni.

Haraldur Sigurðsson ásamt sonum sínum við Litlatind Mynd úr safni DAS

Haraldur virðist hafa selt bátinn strax því næsti eigendi er Jóel Guðmundsson, Háagarði í Vestmannaeyjum, frá 1954. Báturinn var endurbyggður í Vestmannaeyjum 1961. Seldur 19. maí 1961 Einari Ágústssyni, Pétursborg Fáskrúðsfirði, hét Litlitindur SU 326. Seldur 9. júní 1967 Bergkvist Stefánssyni, Baldurshaga, Fáskrúðsfirði. Seldur 1. júní 1973 Jóhannesi Jóhannessyni og Sævari Níelssyni, Fáskrúðsfirði. Heitir Litlitindur SU 508. Báturinn talinn ónýtur og tekinn af skrá 12. febrúar 1986.

Á Tímarit.is fann ég grein úr DV frá þriðjudeginum 18. júní 1985 en þar er rætt við Sævar og Jóhannes eigendur Litatinds. Þeir félagar hafa gert út Litlatind SU 508, 3,8 tonna bát í 13 ár frá Fáskrúðsfirði. Þarna er sagt frá því að þeirra síðustu vertíð á Litlatindi sé lokið, nýr bátur tekur við hans hlutverki.

Ræddi við Jóhannes Jóhannesson annan eiganda Litlatinds. Þegar þeir keyptu bátinn frá Vestamannaeyjum þá var hann með húsi. Jóhannes sagði að þeir hafi skipt um stýrishúsið. Þegar þeir keyptu bátinn þá var 16 ha. SABB vél í bátnum og fljótlega eftir að þeir keypti skiptu þeir um vél og settu 22 ha. SABB vél í bátinn.

Jóhannes sagði að þeir hafi selt Litladins 1986 á Stöðvarfjörð. Man ekki nafn þess sem keypti bátinn. Jóhannes hélt að báturinn hafi aldrei verið notaður eftir að hann kom til Stöðvarfjarðar, hann hafi endað uppi í fjöru.

Hver átti bátinn á Stöðvarfirði?
Hvað varð um bátinn?..............................meira síðar

DV-mynd Ægir, af Tímarit.is

Sögusagnir:
Ég hef heyrt sagt að allir DAS bátarnir hafi verið eins. Það er ekki rétt og það er hægt að sjá það á myndinni af Litlatind. Umförin á Litlatind eru 10. Ef talin eru umförin t.d. á Súlutindi þá er hann alla vegna með 13 umför eða 12,5 umför. Þá má sjá að Litlitindur er ekki með stýrishúsi þegar hann er afhentur og þá er frágangur á stefni annar og kappinn framaná er annar en á hinum bátunum. Eitt sinn heyrði ég sagt í gríni að Litlitindur hafi verið smíðaður úr afgangstimbri og því hafi báturinn orðið minni, ekki til nóg til að hafa hann jafnstóran hinum. Sel það ekki dýrara en ég stal því.

Heimildir:

Íslensk skip, bátar

Tímarit.is

Munnlegar upplýsingar, Jóhannes Jóhannesson

Skrifað af Rikki R.

28.11.2012 20:23

Myndverk af tréverkum

Ég fékk strax viðbrögð við því að hafa ekki sett inn bátamyndir núna síðast. Ég vil hafa smá tilbreytingu í þessu hjá mér. Ég talaði um tréverki. Það var nú bara af því ég fékk flís, sem sagt tréverk:)

Set hér inn myndverk af tréverkum. Sagan um hvern og einn kemur síða en þessar myndir eiga að róa þá sem hafa þessa verki sem áður eru nefndir. Auðvitað er það svo að ef þið vitið eitthvað annað en standur í Íslensk skip, bátar þá endilega látið það koma. Þá má geta þess að þar sem ég er nú mest með trillurnar þá er kanski sá fyrsti full stór fyrir mig.

Álftafell ÁR 100, kanski full stór fyrir mig en..............

Kambur BA 34 ex Sigrún SH 212

Silfri KE 24

Blíðfari GK 234

Fanney SK 68

Skrifað af Rikki R.