Náði nokkrum myndum af æðarfuglum í Hafnarfjarðarhöfn 02.05.2009.  Setti þær inn í fuglaalbúmið svo fyrir þá sem vilja þá eru þær þar.  Hér koma tvö sýnishorn.

Æðarkolla.


Hér má sjá ungan blika sem er að klæðast fullorðinsbúningi.  Hann er með síld í goggnum.  Þegar ég sá þessa mynd þá tók ég eftir fullorðna blikanum sem er að synda undir þeim unga, í kafi.  Hélt fyrst að þarna væri einhver glampi á sjónum en svo er ekki.  Sá þetta ekki þegar ég tók myndina, finnst þetta augnablik flott þó myndin sé ekkert spes.

Í Stykkishólmi er bátshræ við Landeyna, móti Skipavík.  Þessi bátur hefur alltaf verið í miklu uppáhaldi hjá mér síðan ég fór að koma í Stykkishólm.  Ég er reyndar ekki einn um að hafa þennan bát í uppáhaldi því gráhegrar venja komur sínar nokkuð reglulega í þennan bát.  Ég hef reyndar ekki komið út í bátinn svo það hafa hegrarnir framyfir mig.  Ég hef tekið nokkrar myndir af bátnum því mér finnst hann vera "myndvænn" þó í raun sé hann líti á þessum fallega stað.  

Ræddi við menn í Stykkishólmi m.a. Einar Karlsson, til að afla mér upplýsinga um bátinn.  Báturinn mun hafa heitið Þorgeir og kom frá Sandgerði eða Grindavík.  Þessi bátur kom í skiptum fyrir togara til Bæjarútgerðarinnar í Stykkishólmi.  Þorgeir var aldrei gerður út frá Stykkishólmi en settur á legu á svonefndri Þembu þegar hann kom í Hólminn.  Þaðan slitnaði hann svo upp í vondu veðri um 1980 og rak upp í Landeyna og hefur verið þar síðan.  

Tók nokkrar myndir af bátum sem ég sá í Stykkishólmi um síðustu helgi.  Hér eru tvær myndir, vill svo til að þeir heita báðir Fjóla.  Fleiri myndir í albúminu Skip og bátar.

2070 - Fjóla SH 7

1192 - Fjóla SH 55
Myndirnar eru teknar 26.04.2009 í höfninni í Stykkishólmi.

Á ferð minni heim úr Stykkishólmi sá ég þennan fjallstopp sem ég hef ekki hugmynd um hvað heitir.  Fannst þessi fjallstoppur minna mig svolítið á drottningu íslenskra fjalla, Herðubreið.  Ef þið þekkið þetta fjall þá endilega sendið mér línu.

Myndin er tekin 26.04.2009.

Skrapp og kíkti á fugla við Bakkatjörn á Seltjarnarnesi.  Tók þar nokkrar myndir sem sjá má í fuglamöppunni.  Meðal annars eru þarna hringmáfar.  Hér má sjá myndir af tveimur hringmáfum.

Hringmáfur við Bakkatjörn á Seltjarnarnesi.  Myndin tekin 18.04.2009.


Hringmáfur við Bakkatjörn á Seltjarnarnesi.  Myndin tekin 18.04.2009.

Hér er mynd sem ég tók í gær 18.04.2009 og sýnir bátinn Polaris - 162.  Neðri myndin er tekin 31.01.2009 af sama bát en þar heitir hann Fagriklettur HF 123 - 162.  Í stuttu máli, Fagriklettur verður Polaris.

Polaris - 162  Tekin 18. apríl 2009 í Hafnarfjarðarhöfn.

Fagriklettur HF 123 - 162  Tekin 31. janúar 2009 í Hafnarfjarðarhöfn.

Á ferð minni um Hafnarfjörð í gær, 18. apríl, veitti ég athygli að í höfninni í Hafnarfirði var Björgunarveit Hafnarfjarðar við æfingar.  Þarna var verið að kenna nýliðum að rétta við gúmmíbát sem hafði oltið. Krakkarnir veltu bátnum og réttu hann svo við aftur.  Þetta gekk svona og svona.  Setti albúm, Björgunasveit Hafnarfjarðar æfir.  Hér má sjá þegar verið er að velta bátnum og leiðbeinendurnir stökkva í sjóinn.  Báturinn á góðri leið með að velta.

Myndin tekin 18. apríl 2009 í Hafnarfjarðarhöfn.

Ég hef lítið verið á ferðinni undanfarið.  Ég skrapp þó í Fossvogskirkjugarð annan í páskum.  Þar er vor í lofti, mikill fuglasöngur og krókusar spretta sem aldrei fyrr.  Hér er ein mynd hér af Baldvini Njálssyni GK 400 á leið inn í Hafnarfjarðarhöfn þann 11.04.2009.

Svartþröstur með orm.  Myndin tekin 13.04.2009 í Fossvogskirkjugarði.


Krókusar í Fossvogskirkjugarði.  Myndin tekin 13.04.2009.


Baldvin Njálsson GK 400 á leið inn í Hafnarfjarðarhöfn.  Myndin er tekin 11.04.2009.

Hér eru tvær svarthvítar myndir teknar 05.03.2009.  Hesturinn er tekin rétt við Urriðakotsvatn og hin tekin, ja, nánast hvar sem er en ég smellti af þar sem ég stóð uppi í Heiðmörk.

Þessi álft tók lífinu með ró og sólaði sig.  Myndin er tekin við Elliðavatn að austanverðu, við brúna þegar ekið er inn í Heiðmörkina 28.02.2009.  Fleiri myndir inn í Fugla-albúminu.

Þessar myndir hér að neðan eru teknar 28.02.2009 á ferð minni víða um höfuðborgarsvæðið.  Fleiri myndir eru í albúminu Stór-Hafnarfjarðarsvæðið.

Aðgerðarlausir kranar við nýja Tónlistaðrhúsið.  Í dag er vinna hafin þarna aftur sem er gott.

Viðeyjarstofa í mjög fallegur veðri.

Vetrarmynd við Rauðhóla.

Þann 07.03.2009 gengum við framá þrjá kafara í Óttarstaðavör við Straumsvík.  Reyndar voru þetta kennari með tvo nema.  Kennarinn er hér framstur á myndinni að stíga í land og nemarnir bíða þægir þar til kennarinn snér aftur og þá fóru þeir af stað.

Hér leggja þeir af stað.  Kennarinn er sá aftari.  Myndirnar teknar 07.03.2009.

Í tvígang hef ég farið að skoða bát sem er ekki langt frá Straumi n.t.t. við Glaumbæ.  Þarna er um björgunarbát að ræða, yngri en þann sem ég hef þegar myndað við Elliðavatn.  Þessi er talsvert heillegri.  Þann 07.mars fórum við fjölskyldan í göngutúr þarna á svæðinu kringum Straum.  Þarna er mikið að mynda og var ég búinn að kynna mér aðeins staðhætti með því að fara inn á www.ferlir.is en þar eru krot, frásagnir og ýmis fróðleikur af þessu svæði.  Þetta höfðum við með okkur í þennan göngutúr okkar og gerði það ferðina á þessu svæði mun áhugaverðari.  Setti inn slatta af myndum frá þessu svæði.  Hér koma tvær myndir úr ferð fjölskyldunnar.

Hér má sjá alla fjölskylduna við björgunarbátinn.  Myndin tekin 07.03.2009.


Eitt af húsunum sem er þarna.  Myndin tekin 07.03.2009.

Þær upplýsingar sem ég hef fengið um bátinn sem ég spurði um væri að þetta væri björgunarbátur, ekkert ósvipaður og hafi verið á Titanic. Þá var einnig nefnt að þetta gæti jafnvel verið snurpari af nótabát.  Setti inn talsvert fleiri myndir af bátnum við aðeins breyttar aðstæður, nú allt hvítt, nýtt albúm sem heitir Bátur við Elliðavatn.  Snjómyndirnar teknar 28.02.2009 en hinar voru teknar 26.02.2009.  Eins og fyrr segir er þessi bátur skammt frá Elliðavatni en talsvert uppi á landi.  Við gerðumst svo grófir að telja þetta jafnvel vera örkina hans Nóa, á strandstað.  Ja, hvað vitum við, fyrst Titanic var komið til sögunnar því þá ekki alveg eins Örkin?

Þá er komið inn sér albúm bara með myndum af Bessastöðum sem ég talaði um hér fyrir nokkru síða.  Þegar ég skoða þetta þá má greinilega sjá að þetta er frekar einsleitt allt saman, nema helst veðrið, það er breytilegt.  En sjón er sögu ríkari.