Fallegt sólsetur í gærkveldi.  Ég skellti mér út á Garðaholtið til að horfa á sólsetrið og reyna að ná myndum af því.  Með því að sýna ykkur þessar myndir þá vona ég að þið sjáið aðeins smá hversu fallegt sólsetrið var í raun.

Séð yfir Skógtjörn á Álftanesi.  Sólin að setjast bak við Snæfellsjökul.


Fjórar margæsir á flugi inn í sólarlagið..................ohh en rómó.......


Sólin hnigin bak við Snæfellsjökul, sjá má síðasta blik sólarinnar, smá punktur.


Snæfellsjökull, 07. maí 2011

Smá viðbót við það sem ég skrifaði áður.  Ég setti hér neðst að nú væri að sjá hvort Náttís vildi gera eitthvað í málinu.  Ég var að vonast til að fá smá viðbrögð hér inn en ekkert svoleiðis gerðist.  Hins vegar þá var þetta sett inn á hóp fuglaskoðara.  Ég veit hins vegar að þeir sem sjá eiga um að farga dýrum er lögreglan og ég hef talað við kollega mína í Hafnarfirði vegna þessa.  Ég ætlaðist ekki til að þetta rataði neitt annað en hingað og hér vildi ég fá viðbrögðin.  Verð greinilega að nota aðra taktík til að fá viðbrögð.  Hvað svo verður gert kemur í ljós, lögreglan í Hafnarfirði ætlar að kíkja á málið og sjá hvort þeir finni gæsirnar.

Upphafleg skrif
Ég veitti þessum tveimur grágæsum athygli þar sem þær virtust í fyrstu svo gæfar.  Svo sá ég hvað var að, þær eru báðar vængbrotnar.  Önnu sýnilega verr farin en hin.  Ég velti fyrir mér hvað hafi gerst og datt strax í hug að þar sem þarna er hestagyrðing og vír strengdur yfir rennuna sem liggur síðan undir veginn í átt að Kasthúsatjörn.  Ég sá grágæsir í smá leikjum og var mikill hamagangur.  Mér datt helst í hug að þessar tvær hafi verið í svona leikjum og endað á vírnum.  Alla vegna þessir ræflar eru þarna og nú er að sjá hvort Náttúrufræðistofnun vill gera eitthvað í málinu.

Tvær vængbrotnar grágæsir, Álftanes 07. maí 2011

6190 Frosti HF 320, Hafnarfjörður 05. maí 2011

Smíðaður af Eyjólfi Einarssyni skipasmíðameistara í Hafnarfirði árið 1981 fyrir Viðar Sæmundsson.  Lengd 9,35,00 m, Breidd 2,83 m, Dýpt 1,57 m, Brúttótonn 7,36

Sjósettur um páska 1981.  Viðar fiskaði um 40 tonn fyrsta mánuðinn. Aðspurður vildi Viðar gera frekar lítið úr fiskiríinu, en jú jú, hann hafi fiskað þokkalega fyrstu vertíðina.

Í upphafi var Volvo Penta vél í bátnum.  Vélin hafi ekki virkað sem skildi og skipti Viðar um vél og var sett í bátinn önnur Volvo Penta vél, 63 ha. Árg. 0-1985.  Sú vél er ennþá í bátnum í dag og slær ekki feilpúst.  Þá skildist mér á Ragnari, næsta eiganda, að Viðar hafi skipt um olíutank í bátnum rétt áður en hann keypti bátinn.

Ragnar Hjaltason í Hafnarfirði kaupir bátinn um 1991.  Ragnar kvaðst ekki hafa gert neinar stórar breytingar á bátnum.  Það hafi verið eðlilegt viðhald, borið á bátinn og málað.  Lét einu sinni sauma hann upp, skipti um lunningar, setti radar í bátinn.  Þetta hafi verið rétt fyrir aldamótin síðustu, líklega um 1998 taldi Ragnar.  Ragnar kvaðst hafa gert bátinn úr á þorskanet og róið norður í Bugt.  Þá hafi hann verið á grásleppu og ýsu svo eitthvað sé nefnt.  Þetta sé hörku sjóbátur.

Ragnar kvaðst hafa selt bátinn til Ágústar Hinrikssonar.  Ragnari fannst Ágúst ekki hugsa nógu vel um Frosta og hafi báturinn svolítið drabbast niður. 

Hugarró ehf kaupir bátinn 2010, í enda sumars og er eigandi bátsins í dag.  Eigandi Hugarró ehf er Ástgeir Finnsson.  Ástgeir er nýbúinn að setja Frosta á flot eftir endurbætur.  Hann kvað Frosta hafa verið frekar sjúskaðan enda búinn að vera á landi nokkuð lengi.  Báturinn farinn að þorna.  Ástgeir kvaðst hafa þurft að skipta um lunningar og öldustokk.  Skrokkurinn hafi sloppið nokkuð vel, þurfti aðallega að komast á flot til að þéttast aftur.  Ástgeir kvaðst ætla að nota bátinn til veiða, en hann færi ekki af stað fyrr en báturinn væri orðinn klár, allt komið í lag.  Hann kvaðst aðeins hafa prófað að sigla bátnum eftir að hann setti á flot og kvaðst hann ánægður með útkomuna.

Þess má gera í framhaldi af þessu að Eyjólfur Einarsson smíðaði strax á eftir Frosta annan bát, eins og Frosta nema lítið eitt lengri.  Þessi bátur heitir Fróði og er nú í lagfæringu við Hvaleyrarlón í Hafnarfirði.  Næsta verkefni hjá mér......................?

Þann 1. maí var allt á kafi í snjó hér á höfuðborgarsvæðinu.  Ég tók því smá rúnt til að sjá hvernig fuglarnir hefðu það.  Flestir fuglar héldu sig í fjörunum þar sem autt var.  Þó rakst ég á einn og einn sem vappaði um í snjónum.  Þessar grágæsir og þúfutittlingurinn voru á Álftanesinu á kafi í snjón.  Hins vegar er síðasta myndin tekin sama dag úti við Bakkatjörn á Seltjarnarnesi.  Þar var enginn snjór þ.e. við tjörnina.  Á þessari mynd má sjá vel hvernig felubúningur þúfutittlingsins virkar.  Hann er ekkert of greinilegur þó myndin sé þokkalega nálægt.

Harpan strengjalausa en ekki glerlausa varð á vegi mínum.  Ég stoppaði á rauðu ljósi móts við Hörpuna og þegar ég leit í átt að henni fannst mér gluggarnir eitthvað svo flottir.  Ég tók því eina mynd svona til að reyna að fanga það sem ég sá.  Nú langar mig að leyfa ykkur að sjá það sama og ég sá.  Ekki vantar að þetta gluggaverk er flott en ég segi kanski ekki það sama um húsið sjálft.  Ég ætla svo á tónleika í Hörpunni fljótlega, það er annað mál.

Hef verið í vandræðum með tölvuna mína og er ennþá.  Ætla samt að prófa að setja hér inn smá fréttir.  Myndaði eitthvað að bátum bæði 01. og 03. maí hér í Hafnarfjarðarhöfn.  Hér er smá sýnishorn.

Þessir var í Reykjavíkurhöfn 29. mars 2011.  Þessi árabátur sem málaður er í íslensku fánalitunum og "fóðraður" að innan með gulri málningu hefur verið í Reykjavíkurhöfn lengi.  Ég hef alltaf verið að skoða það að mynda þennan bát en aldrei gert það fyrr en nú.  Fannst speglunin í sjónum koma vel út, minnir mig á útlönd einhvern vegin.

Íslendingur eða Litla Gunna.  Reykjavíkurhöfn 29. mars 2011

29. apríl 2011 náði ég sambandi við Gunnar Snorrason eiganda bátsins.  Gunnar kvað þetta vera færeying og hann hafi fengið Jón Samúelsson á Akureyri til að smíða fyrir sig þennan bát.  Það hafi líklega verið um 1980 en báturinn væru um 30 ára gamall. 
Gunnar kvaðst í upphafi hafa kallað bátinn Litlu Gunnu, svo hafi hann farið að breyta litnum á bátnum og nú sé hann oftast kallaður Íslendingur.  Spurning að hafa það bara "Litla Gunna er Íslendingur".
Gunnar kvað bátinn óbreyttan frá því hann var smíðaður fyrir utan gólfið.  Hann kvaðst hafa látið smíða bátinn fyrir sig til að geta farið og fengið sér í soðið annað slagið.  Gunnar notast við 5 ha. rassmótor á bátinn.  Ég er búinn að vera með bátinn á Akureyri, Raufarhöfn og nú er hann hér í Reykjavík og þetta er hörku sjóskip, sagði Gunnar að lokum.

Af bátum er það helst að Sigurborg II var sett aftur á flot í dag.  Ólafur Gíslason eigandi hefur líkast til verið að ditta eitthvað að bátnum.  Samkvæmt áreiðanlegum heimildum þá þurfti Ólafur að setja nýtt sink undir bátinn.  Þá kom Hafsúlan siglandi inn í Hafnarfjarðarhöfn.

7133 Sigurborg II HF 116 var aftur sett á flot í dag, 26. apríl 2011


Hafsúlan kom til Hafnarfjarðar seinnipartinn í dag, 26. apríl 2011

Leit við á Álftanesinu í dag og smellti myndum af því sem kallað er kviðdökk margæs eða austræn margæs en þær flokkast til flækingsfugla.  Þessar kviðdökku margæsir sjást hér nánast á hverju ári, ein og ein.   Hér sjáiði vel muninn á þessum margæsum og hvers vegna hún er kölluð kviðdökk.

Kviðdökk margæs til hægri.  Álftanes 26. apríl 2011

Þá er blessuð lóan líka komin til landsins og ég náði að smella einni af henni líka.  Þessi er merkt en því miður næ ég ekki að lesa á merkið.

Heiðlóa við Kasthúsatjörn á Álftanesi 26. apríl 2011

Magga mín, hér er mynd af maðkavíkinni í Stykkishólmi.  Talsverður munur er á að sjá þetta svæði á flóði eða fjöru.  Set hér inn tvær myndir sem ég á af þessu svæði sem sýnir bæði hvernig þetta lýtur úr á fjöru og svo á flóði.  Mjög fallegt svæði.  Ég veit hins vegar að þú ert ekki hrifin af nafninu en fegurðin er áhrifameiri en nafnið, það get ég staðfest.  Neðsta myndin sýnir staðsetningu maðkavíkur betur, sem sagt neðan við kirkjuna, fyrir ykkur sem ekki vitið.

Við Maðkavík, 22. apríl 2011


Við Maðkavík, 21. febrúar 2010


Við Maðkavík, 25. desember 2010

Gleðilega páska allir mínir menn!  Ég vaknaði eins og í gamla daga og þá var þetta líka flotta páskaegg á náttborðinu.  Auðvitað braut ég það og las málsháttinn:  ALLIR MENN EIGA TVÆR ÆTTIR.  Þetta mun rétt vera, föðurættin og móðurættin.  En meðan ég las málsháttinn var útvarpsmessan í gangi og þar var verið að segja frá Jesú.  Mér var því hugasð til hans, eingetinn og allt.  Hann átti því ekki tvær ættir blessaður maðurinn.  Eftir þessa hugsun þá missti þessi málsháttur marks.

Eftir allt þetta hér á undan þá er hér "niðurbrotið" páskaegg.  24. apríl 2011

Fjölskyldan á Breiðvangi fór og heimsótti fjölskylduna úr Sólarsölum í sumarbústað.  Það voru frábærar móttökur sem við fengum.  Ég smellti nokkrum myndum af ungviðinu en sleppti fullorðna fólkinu.  Fyrir ykkur sem hafði áhuga þá smelliði á myndirnar og þá sjáiði fleiri myndir.

Andrea Odda tók lagið og söng fyrir okkur.  23. apríl 2011


Elín Hanna og Róbert Max smelltu sér í heita pottinn.  23. apríl 2011


Ísabella Embla skoðaði táslurnar mjög vel.  23. apríl 2011

Þessi var í Maðkavíkinni í dag, 22 apríl 2011, þegar ég átti leið þar um.  Hef ekki séð þennan áður en ég festi hann á kubb og svo er bara að sjá hverjir geta leiðbeint mér með þennan.

Eigandi bátsins er Hildibrandur Bjarnason í Bjarnarhöfn.  Gunnlaugur Valdimarsson var að gera við bátinn fyrir Hildibrand í vetur.

Báturinn var smíðaður af Rögnvaldi Krisjánssyni skipasmið kringum 1940-41.  Báturinn var seldur á Reyðafjörð.  Var búinn að standa eitthvað þegar Hildibrandur eignaðist bátinn fyrir um 15 árum síðan (kringum 1996).
Sumarið 2011, er báturinn orðin garðskraut í Garðabæ og eigandinn heitir Ágúst, sagði Gulli mér.
Ekki vitað hvað báturinn heitir.

Heimildir:
Gunnlaugur Valdimarsson, munnlegar upplýsingar.

Bátur í eigu Hildibrands í Bjarnarhöfn í Maðkavíkinni, 22. apríl 2011

Þessi bátur var fyrir utan hjá Gunnlaugi Valdimarssyni í Stykkishólmi.  Ég ræddi við Gunnlaug 25.04.2011.

Gunnlaugur kvað núverandi eigendur væru hann sjálfur og Erlendur (föðurnafn vantar).  Þeir hafi sótt bátinn s.l. haust norður að Eyjum í Strandasýslu en þar hafi báturinn legið nánast ónýtur.  Það hafi m.a. vantað efsta umfarið og borðstokkinn ásamt því að götu hafi verið víða á skrokknum.  Gunnlaugur sagði svona í gríni að báturinn hafi hangið saman af gömlum vana.
Gunnlaugur sagði mér að það væru skiptar skoðanir um hvar þessi bátur væri smíðaður, sumir vilja meina að hann sé smíðaður í Bátalóni en aðrir vilja meina annað miðað við bátalagið.
Í bátnum er 8-10 ha. Yanmar vél.

Gunnlaugur kvaðst ekkert vita meira um þennan bát en benti mér á að ræða við Eðvarð Jóhannsson.  Eðvað sagði að fyrri eigandi hafi verið Benjamín Sigurðsson Eyjum.  Benjamín mun alltaf hafa átt báta sem heiti Farsæll, en hann hafi verið með grásleppuútgerð. 

Hákon Örn Halldórsson skrifaði:  Farsæll kom að Eyjum um 1970 frá Hafnarfirði.  Mun vera smíðaður af bátasmið þar, Jóhanni Gíslasyni að hann minni.  Farsæll hafi ekki verið smíðaður í Bátalóni.

Þann 5. júní 2012 rak ég augun í Farsæl í Hafnarfirði.  Ég áttaði mig ekki í fyrsu á að þetta væri Farsæll en ég hitti á eigandann eftir að hafa smellt nokkrum myndum af bátnum.  Núverandi eigendur eru Sigtryggur Jónsson og barnabarn hans Sigtryggur Bjarnason.  Þeir keyptu bátinn af pari, einhverjum listamönnum sagði Sigtryggur sem bjuggu á Seltjarnarnesi.  Sigtryggur kvað þá vera búna að taka vélina í gegn, rifu hana stykki fyrir stykki og máluðu hana.  Vélin er klár til að fara í bátinn.  Sigtryggur sagði jafnframt að Sigtryggur yngri myndi koma á morgun, 6. júní, og brenna utanaf bátnum og skafa.  Sá yngri vill skipta um lit og hafa borðstokkana græna og skrokkinn hvítan.  Sigtryggur eldri sagði að nafni sinn fengi að ráða nafni bátsins, hvort það verður áfram Farsæll eða skipt um nafn á eftir að koma í ljós.

Tveir kafarar voru að leggja af stað í köfun í höfninni í Stykkishólmi í dag, 22. apríl 2011.  Ég tók nokkrar myndir af þeim allt frá því að þeir klæða sig, hoppa útí og synda í kafi.  Fleir myndir í albúmmi, Kafarar í Stykkishólmi.

Hopp, Stykkishólmur 22. apríl 2011


Báðir komnir útí, Stykkishólmur 22. apríl 2011


Á kafi.  Stykkishólmur 22. apríl 2011