Ljósmyndasíða Rikka

Fuglar, gamlir bátar, mannlíf, íslensk náttúra eins og ég sé hana

Færslur: 2011 Nóvember

21.11.2011 21:00

Arkitektúr

Tók þessa mynd í mars 2011 og þóttist sjá eitthvað flott út úr þessu.  Arkitektúr hefur verið til umræðu varðandi byggingar við Skálholt.  Þegar ég skoðaði myndirnar mínar rak ég augun í þessa og fékk hugmynd varðandi Skálholt. 

Datt í hug hvort ekki væri nú bara hægt að byggja eitt stykki svona blokk í Skálholti og nota sem hótel, fá ferðamanninn á staðinn.  Hvað þarf til að fá ferðamanninn í Skálholt.

Sumir segja að sagan ein og sér dragi ferðamanninn í Skálholt, aðrir vilja byggja upp gömlu húsin.  Ég hins vegar fer ekki í Skálholt nema við sérstök tækifæri og þau koma mjög sjaldan, þá er ég ekki að skoða arkitektúr né nokkuð annað, þá er ég að fara í kirkju.  Þegar því líkur þá fer ég heim aftur og kíki frekar eftir fuglum á leiðinni. 


Arkitektúr í Hafnarfirði 9. mars 2011

21.11.2011 20:32

Á slóðum kerlingar!

Á slóðum kerlingar.  Já, kerlingin í Kerlingarskarði er ekki langt þarna frá og sagan segir að hún hafi verið á leið til sínst heittelskaða út á Snæfellsnes.  Fyrstu sólargeislarnir náðu til hennar svo hún varð að steini, grei kerlingin.
Þegar ég tók þessa mynd voru síðustu sólargeislarnir á ferðinni og ætli mætti ekki segja að rétt eftir þennan tíma hefði kerlingin hlaupið af stað til að hitta karlinn.  Því miður þá kemst hún ekkert blessunin en það hefði verið gaman að sjá hana stökkva þarna milli fjallanna.
Ég er nokkuð sáttur við hvernig þessi mynd tókst til.  Birtan var sérstök, mistrið/þokuloftið setti smá dulúð í þetta.  Mér sýnist hafa tekist nokkuð vel til.


Á Snæfellsnesi, 13. nóvember 2011

14.11.2011 22:01

Brúðkaup í Stykkishólmi

Má til með að setja inn eina mynd, eða þrjár, af nýbökuðum brúðhjónum sem giftu sig laugardaginn 12. nóvember 2011.  Ég var sérlegur hirðljósmyndari og get því misnotað aðstöðu mína eins og mig langar til.  Selma Rut og Gunnar, til hamingju enn og aftur.


Gunni kokkur þunkt hugsi, 13. nóvember 2011


Selma Rut í hárgreiðslu, 13. nóvember 2011


Búið að pússa saman, 13. nóvember 2011

14.11.2011 09:04

Síldveiðar í Breiðafirði

Þó ég hafi skroppið í Stykkishólm nokkrum sinnum á undanförnum árum þá hafði ég aldrei orðið svo heppinn að verða vitni af því þegar síldveiðiskipin, loðnuskipin o.fl. eru að veiða uppi í landsteinunum.  Þetta breyttist í gær, 13.11.2011.  Ég kíkti á þau skip sem voru við síldveiðar.  Ég keyrði út í Ögur.  Þar inni í "stofu" var Júpíter að dæla út nótinni.  Ég segi svona, því rennan milli Kiðeyjar og Ögurs er ekki mjög breið. 
Þá voru fleiri bátar þarna, sá þrjá aðra en myndaði þá ekki.  Smellti þó tveimur fjarskafríðum myndum af tveimur saman á heimleiðinni.  Tel mig þekkja þá en þið leiðréttið ef rangt er.


Júpíter innan við Kiðey, Ögur 13. nóvember 2011


Júpíter við dælingu, Ögur 13. nóvember 2011


Þeir voru þarna fleiri við veiðar en ég náði bara svona fjarskafagri mynd af þeim:)  Er ekki viss um hverjir þetta eru en gætu verið Vilhelm Þorsteinsson EA og Beitir NK?  Var lengi að leita.

09.11.2011 20:06

Svanur, Reykjavík

Svanur var í Snarfarahöfninni í sumar og nú er búið að taka hann á land.  Engar upplýsingar hafði ég í upphafi þar til Teddi benti mér á réttu leiðina.  Takk fyrir það Teddi.  Eina sem ég vissi var að báturinn hafi alltaf heitið Svanur.

Svanur BA 306 var smíðaður veturinn 1941-42 af Gísla Jóhannssyni í Bíldudal fyrir Árna Magnússon Kolbeinsskeið (kallað Skeiði) í Selárdal.  Árni eignaðist bátinn vorið 1942.  Smíðaður úr eik og furu.  1,5 brl.  4 ha. Sleipner vél.  Báturinn hefur alltaf heitið Svanur og var opinn í upphafi.

Árið 1995 var báturinn endurbyggður.  Endurbygging hófst 20. mars og lauk 30. maí 1995.  Í fyrstu voru böndin höfð í bátnum meðan skipt var um byrðinginn.  Síðan var skipt um böndin.  Sett var á bátinn stýrishús, að aftan.

Árið 2001 var báturinn tekinn aftur í gegn en þá var skipt um stýrishús og það sett að framan.  Það eina sem eftir er af upprunalega bátnum er stýrissveifin, sagði Bergsveinn.  Í dag er 8 ha. Sabb díselvél í bátnum.

Til gamans má geta þess að ein "smá" kvöð fylgdi bátnum þegar synir Árna fengu bátinn.  Það er að þegar synirnir hætta að nota bátinn þá á að farga honum.
Núverandi eigendur eru Bergsveinn, Jón og Sveinn Árnasynir.  Sveinn sagðist þó vera búinn að draga sig út úr þessu og tæki ekki þátt lengur.

Framtíð Svans er nokkuð óráðin að sögn Bergsveins en báturinn er kominn upp á land og spurning hvað gerist næsta vor.

Upplýsingar
Sveinn og Bergsveinn Árnasynir, munnlegar upplýsingar.
Íslensk skip, bátar - 1. bindi bls. 77.


Svanur, Snarfarahöfn 23. október 2011

09.11.2011 19:59

Hrólfur x Ötull

Myndaði þennan við höfnina í Kópavogi 5. nóvember 2011.  Núverandi eigandi heitir Þorvaldur Hermannsson, ég gef honum orðið.


Bátinn smíðaði Ragnar Jörundsson á Hellu við Steingrímsfjörð árið 1984 fyrir mann að nafni Henrý Níelsen, Drangsnesi. Henrý seldi Hrólfi Guðmundssyni bátinn nokkrum árum síðar.  Ég fékk síðan bátinn sumarið 2009 en hann hafði verið geymdur á bak við gömlu fiskimjölsverksmiðjuna á Hólmavík í nokkur ár. Hann var í mjög slæmu ástandi, gisinn og ljótur. Báturinn hét Ötull í eigu Henrýs en ég hef nefnt hann Hrólf í höfuðið á fyrrum eiganda. Ég læt fylgja tvær myndir með en önnur er af bátnum þar sem hann liggur undir vegg fyrir endurbætur og  hin eftir endurbætur.


Hrólfur áður en Þorvaldur og Hermann gerðu hann upp. 
Mynd í eigu Þorvaldar Hermannssonar, tekin 14. júní 2009

Ég og faðir minn Hermann smíðuðum  hvalbak á bátinn, við bjuggum til nýja plitti (gömlu voru alveg ónýtir), skröpuðum alla gamla málningu af, kíttuðum mikið og máluðum allan bátinn frá a-ö. Einnig styrktum við bátinn aðeins. Öll járnvinna var gerð af pabba mínum (er járnsmiður), statíf undir handfærarúllu (gömul Hellurúlla), keifar o.fl.. Við erum síðan með gamlan Johnson mótor, sea horse 20 hö árgerð ´73, sem gengur eins og klukka. Einnig var smíðuð kerra undir hann. Við höfum verið með bátinn í Kópavogshöfn undanfarin tvö sumur en stefnum á að fara með hann aftur á æskustöðvarnar og róa á honum frá Hólmavík. Hann nýtur sín best á Steingrímsfirði. Áður en það gerist þarf að skipta um fjögur borð í skrokknum, laga flest böndin, kítta , mála og betrum bæta plittina.


Nýuppgerður, mynd í eigu Þorvaldar Hermannssonar, tekin 09. febrúar 2010


Hrólfur, Kópavogur 05. nóvember 2011

06.11.2011 22:17

Myndlistasýning

Kíkti á myndlistasýningu í dag sem opnuð var í Kaffihúsinu á Álfossi, Álafosskvosinni.  Þarna voru þær Ásdís Gígja og Fanný Jónmundsdóttir að sýna verk sín.  Ásdís sýndi vatnslita- og olíumálverk en Fanný var með íkonamyndverk.
Ég smellti mér með myndavélina á svæðið og tók myndir af verkunum.  Sá reyndar að þegar ég var að setja myndirnar inn þá gleymdi ég að taka myndir af öllum íkonamyndverkunum hennar Fannýar. 

Ég hafði gaman af þessari sýningu og mæli með að menn líti á þessa sýningu og geti þá fengið sér kaffi í leiðinni.


Fanný og Ásdís við hluta verka sinna.  6. nóvember 2011


Þrjú verka Ásdísar. 6. nóvember 2011


Tvö af íkonhandverkum Fannýar, 6. nóvember 2011

06.11.2011 00:48

Drekinn hans Hjartar

Á ferð minni í gær rak ég augun í Hjörtur og félaga þar sem þeir voru með drekana sína við Hlíðsnesið.  Ég smellti nokkrum myndum af Hirti þar sem hann var á fullri ferð.  Hér má sjá tvær þeirra.


Hjörtur á fullri ferð, 05. nóvember 2011

Hjörtur á fullri ferð, 05. nóvember 2011

05.11.2011 21:32

Vífilsstaðir

Oft þegar ég keyri framhjá Heiðmörkinni og stefni í átt að Vífilsstöðum þá er alltaf eitthvað sem nær athygli minni varðandi þetta hús, Vífilsstaði.  Þegar sólin skín á húsið er það eitthvað svo tignalegt.  Rétt eftir að ég smellti af þessari fyrri mynd þá dró fyrir sólu.  Seinni myndin sýnir þetta greinilega, skuggi er að dragast yfir vesturenda hússins (frá vinstri).


Vífilsstaðir 05. nóvember 2011


Dregur fyrir sólu 05. nóvember 2011

05.11.2011 21:20

Fólk í Stykkishólmi

Nokkrar myndir úr Stykkishólmi á árinu 2011, af fólki við leik og störf.  Er að fjölga myndum í albúmi: Fólk í Stykkishólmi. 


Dittað að krana um borð í Baldri, 23. janúar 2011


Elín Hanna og Einar afi taka til flöskur, Stykkishólmur 23. janúar 2011


Ungar snótir í Stykkishólmi, 02. júlí 2011


Þrjár frænkur og ein vinkona á balli hjá Páli Óskari, Stykkishólmur 13. ágúst 2011


Fjörugir krakkar í Hólminum, Stykkishólmur 13. ágúst 2011


Þeir frændur, Raggi og Einar Stein velta himingeimnum fyrir sér, Stykkishólmur 02. júlí 2011

05.11.2011 21:11

Snarfarahöfn

23. október 2011 var mjög fallegt veður eins og sést vel á myndunum hér að neðan.  Ég tók nokkra ramma við Snarfarahöfnina en þar var sjórinn spegilsléttur.  Ég vona að ykkur líki þessar myndir svona til að létta ykkur þessa úrkomudaga sem eru núna.  Við eigum eftir að fá svona verður aftur.


Sumar af snekkjunum í Snarfarahöfn, 23. október 2011


Speglun í Snarfarahöfn, 23. október 2011


Speglun í Snarfarahöfn, 23. október 2011


Frá Snarfarahöfn 23. október 2011

  • 1

Málsháttur dagsins

Svo flýgur hver fugl sem hann er fiðraður !
clockhere

Rikki R

Nafn:

Ríkarður Ríkarðsson

Farsími:

862 0591

Afmælisdagur:

24. september

Heimilisfang:

Breiðvangi 3, 220 Hafnarfjörður

Staðsetning:

Hafnarfjörður

Heimasími:

565 5191

Um:

Fæddur á Húsavík á því herrans ári 1961 og hef tekið ljósmyndir frá því ég var strákur. Aðaláhugamálið er að taka myndir af fuglum en þó mynda ég allt sem mig langar til að mynda eins og sjá má.

Tenglar

Flettingar í dag: 823
Gestir í dag: 41
Flettingar í gær: 823
Gestir í gær: 48
Samtals flettingar: 2786137
Samtals gestir: 206045
Tölur uppfærðar: 18.11.2018 07:49:08