Ég tók mér sumarfrí hér á síðunni minni og var á ferðalagi, veislum og fleira og myndaði á öllum stöðum sem ég kom á held ég. Nú er ég búinn að vinna þær að mestu en finnst nú líklegt að ég eigi eftir að gera eitthvað meira þegar framí sækir.
Í júní fórum við fjögur, ég, Elfa Dögg, Elína Hanna og Gunnsa systir í ferðalag til Ítalíu. Meiriháttar ferð og víða farið. Í stuttu máli þá flugum við til Munchen, ókum að landamærum Þýskalands og Austurríkis þar sem við gistum fyrstu nóttina. Gististaðurinn var í Füssen. Þarna rétt hjá voru tveir kastalar sem við kíktum á en fórum ekki inní. Glæsileg hús eins og þið getið séð.
Neuschwanstein kastalinn í Schwangau, 10. júní 2014
Hohenschwangau Schloss, 10. júní 2014
Því næst var haldið til Sviss þar sem við hittum Brigitt vinkonu Elfu Daggar og Ivo mann hennar. Þar gistum við fjórar nætur. Skoðuðum okkur um og fengum leiðsögn frá Brigitt. Sviss er mjög fallegt, við vorum austarlega í Sviss. Við fórum upp á Säntis fjall sem er 2502 metrar á hæð með kláfi. Því miður þá var þoka með köflum og svo var akkurat þegar við vorum uppi. Niðri sáum við þó húsið uppi á fjallinu og fórum því af stað. Þá var þarna líka forláta Rolls Royce bifreið.
Säntis fjall, 2502 m. á hæð. 12. júní 2014
Rolls Royce. 12. júní 2014
Næst var haldið að Coma vatninu á Ítalíu. Þar gistum við í þrjár nætur á stað sem heitir Villadina Farm. Fallegur staður í litlu þorpi. Auðvitað er hægt að setja út á allt og væri þá helst að hreinlæti hefði mátt vera meira þarna innandyra en þetta var allt í lagi. Þarna skoðuðum við okkur um svæðið og vorum ekki fyrir vonbrigðum með það sem við sáum.
Því næst var haldið suður á bóginn í átt að Lasenza, en þar gistum við í kastala eins og við kölluðum það. La Castello De Anna María. En konan sem rekur staðinn heitir Anna María. Þetta var rosalega flottur staður, þrifalegur og greinilegt að Anna María er smekkkona. Þarna fannst okkur við strax eiga heima. Þarna fórum við og skoðuðum þorpin fimm, eða Quinte Terre eins og það kallast. Við sigldum og sáum staðina frá vatningu og sigldum svo aftur til baka. Fórum í land þar sem við vildum. Frábært og fallegt svæði. Þá var farið einn daginn til Piza að kíkja á þann skakka, sem er enn skakkur. Þarna voru hundruðir manna sem margir voru að "halda" við turninn svo hann ditti ekki.
Kastali Önnu Maríu, 18. júní 2014
Portovenere, 20. júní 2014
Þorpin hanga í klettunum, 20. júní 2014
20. júní 2014
Þá færðum við okkur til La Gerle sem er við Garda vatnið. Þar fórum við og skoðuðum svæðið og enn og aftur urðum við ekki fyrir vonbrigðum. Allt svo fallegt. Einn dagur fór í Verona ferð til að skoða garðinn hennar Júlíu.
Til heilla, halda í brjóst Júlíu, 24. júní 2014
Elín Hanna uppi á svölunum hennar Júlíu, 24. júní 2014
Ástfangnir hengja upp lása, 24. júní 2014
Enn aðrir skilja tyggjóið sitt eftir og skrifa á það, 24. júní 2014
Svo eru þeir sem skrifa nöfnin sín á veggina, Elína Hanna gerði það ekki, 24. júní 2014
Svo var haldið norður á bóginn og komið til Bjargar Ólafar og hennar fjölskyldu í Oberalm í Austurríki. Oberalm er rétt hjá Salzburg svo þið hafið einhverja staðsetningu í huga. Þarna var vel tekið á móti okkur og við stoppuðum í smá tíma. Einn dagurinn fór í að fara með Gunnsu upp í Arnarhreiðrið. Annar dagur fór í að skoða kastala og fleira.
Að lokum var svo ekið aftur til Munchen og flogið heim. Við tókum bílaleigubíl allan tímann og var ekið talsvert á fjórða þúsund kílómetra.